دەنگ نێت

 

وەزارەتی دارایی ھاوشان لەگەڵ گەڕاندنەوەی بۆ سەر کار، سزای ئاگادارکردنەوە بۆ بەڕێوبەری بانکی ناوەندی ھەرێم- سلێمانی دەرکردوە.

 

بە گوێرەی نوسراوێکی وەزارەتی دارایی کە وێنەی دەست رادیۆی دەنگ کەوتوە، وەزارەتەکە لە رێکەوتی ١٥ی ئەم مانگە چەند بڕیارێکی داوە پەیوەست بە دۆسیەی بەڕێوبەری بانکی ناوەندی ھەرێم- سلێمانی.

 

لە خاڵی یەکەمی نوسراوەکەدا، سزای ئاگادارکردنەوە (الإنذار)ی بۆ عەبدولڕەحمان ساڵح رەشید، بەڕێوبەری بانکی ناوەندی ھەرێم- سلێمانی دەرکردوە بەھۆی "پابەند نەبونی بە جێبەجێکردنی رێنمایە داراییەکان تایبەت بە دابەشکردنی مووچە".

 

لە خاڵی دواتردا فەرمانی گەڕانەوەی دەسەڵاتی خەرجی بۆ ناوبراو داوە کە پێش ماوەیەک دەست لەکارھەڵگرتنی بۆ کرابو و لیژنەیەکی لەسەر پێکھێنرا بو.

 

خاڵی سێیەم تایبەتە بە دروستکردنی لیژنەیەکی لێکۆڵینەوە بە سەرۆکایەتی بەڕێوبەرێک لە فەرمانگەی چاودێری و پشکنینی دارایی سلێمانی و ئەندامێتی فەرمانگەی گەنجینەی ١ و ٢ی سلێمانی، بەمەبەستی لێکۆڵینەوە کردن لە خەرج و داھاتی سنوری سلێمانی.

 

خاڵی دواتریش پێویستی کردوە لەسەر بەڕێوبەری بانکی ناوەندی ھەرێم- سلێمانی، بەمەبەستی "کارکردن لەماوەی ٣ مانگ دا بۆ رێکخستنەوەو چارەسەرکردنی دۆخی سیولە بەشێوەیەکی گشتی و بەتایبەتی چۆنیەتی دابەشکردنی داھاتی نەختینەیی ناوخۆ و ئاستەنگەکانی بەردەم دابەشکردنی موچە لە سنوری پارێزگای سلێمانی و ھەڵەبجە و ئیدارەی گەرمیان و راپەڕین".

 

دوێنێ یەکشەمە، بەڕێوبەری بانکی ناوەندی ھەرێم- سلێمانی، دوای زیاتر لە مانگێک لە وەرگرتنەوەی دەسەڵاتی خەرج لێی، دەسەڵاتەکانی بۆ گەڕێنرایەوە و ھاتەوە سەرکار.