ده‌نگ نێت

 

پاش ئه‌وه‌ى 3 پارله‌مانتارى لیستی یه‌كێتى له‌ پارله‌مانى عێراق سكاڵایان له‌ دادگاى باڵای فیدراڵی عێراق دژ به‌ خۆ پاڵاوتنى هۆشیار زێباری بۆ سه‌رۆك كۆمار تۆماركرد، دادگاكه‌ رێكاره‌كانى خۆپاڵاوتنى زێباری راگرت.

 

رۆژى 31ى 1ى 2022، هه‌ریه‌كه‌ له‌ پارله‌مانتارانى یه‌كێتى له‌ ئه‌نجومه‌نى نوێنه‌رانى عێراق: كاروان یاروه‌یس- نوێنه‌رى كه‌لار، دیلان غه‌فور- نوێنه‌رى كه‌ركوك و كه‌ریم شكور- نوێنه‌رى دوزخورماتو، له‌ دادگاى فیدراڵی عێراق سكاڵایان تۆماركرد دژ به‌ خۆ پاڵاوتنى هۆشیار زێباری بۆ پۆستى سه‌رۆك كۆمارى عێراق، ئه‌مڕۆ دادگاكه‌ دانیشتنێكى راوێژكاریی بۆ ئه‌و مه‌به‌سته‌ ئه‌نجام دا و بڕیاری دا رێكارى خۆپاڵاوتنى زێباری رابگرێت.

 

له‌ سكاڵاكه‌ى ئه‌و سێ پارله‌مانتاره‌دا، هۆشیار زێباری تۆمه‌تبار كراوه‌ به‌وه‌ى كه‌ مه‌رجه‌كانى خۆ پاڵاوتنى تێدا نیه‌، به‌وپێیه‌ى پێشتر له‌لایه‌ن ئه‌نجومه‌نى نوێنه‌رانى عێراقه‌وه‌ به‌ تۆمه‌تى گه‌نده‌ڵی متمانه‌ى لێوه‌رگیراوه‌ته‌وه‌، هاوكات دو دۆسیه‌ى دیكه‌یشی له‌ دادگادا هه‌یه‌ په‌یوه‌ندی هه‌یه‌ به‌ زیانگه‌یاندن به‌ دارایی گشتى له‌و كاته‌ دا كه‌ وه‌زیرى ده‌ره‌وه‌ بوه‌ له‌ حكومه‌تى عێراقى دا.