ده‌نگ نێت

 

له‌ پاش سه‌رهه‌ڵدانى قه‌یرانى غازی ماڵانه‌وه‌ حكومه‌ت له‌گه‌رمیان له‌رێگه‌ى ئه‌نجومه‌نى گه‌ڕه‌كه‌كانه‌وه‌ غازی دابه‌ش ده‌كرد، بۆ ئه‌م مانگه‌ ئه‌و رێكاره‌ گۆڕاوه‌ و ئیتر بریكاره‌كانی غاز دابه‌شى ده‌كه‌ن.

 

به‌پێی راپۆرتێكى یه‌كه‌ى چاودێری حكومه‌تى خۆجێی گه‌رمیان، پاش كۆبونه‌وه‌یان له‌گه‌ڵ به‌ڕێوبه‌رى نه‌وت و كانزاكانى گه‌رمیان، له‌باره‌ى كێشه‌ى غازه‌وه‌ ئاماژه‌ى به‌وه‌داوه‌ كه‌ كێشه‌كه‌ بۆ ئه‌م مانگه‌ش (شوبات) به‌رده‌وام ده‌بێت، چونكه‌ ته‌نها بڕی 2 ته‌نكه‌ر زیاد كراوه‌ له‌و بڕه‌ى كه‌ پێشتر ده‌هات و له‌ 14 ته‌نكه‌ره‌وه‌ بوه‌ به‌ 16 ته‌نكه‌رى هه‌فتانه‌، كه‌ ئه‌مه‌ش كه‌مه‌ و به‌شى پێویستی ئیداره‌كه‌ ناكات.

 

له‌گه‌ڵ دروستبونى قه‌یرانى غاز دا، حكومه‌تى خۆجێی بڕیاریدا له‌رێگه‌ى ئه‌نجومه‌نى "موختارى" گه‌ڕه‌كه‌كانه‌وه‌ غاز به‌ ماڵان بدرێت.

 

یادگار فه‌تاح، به‌ڕێوبه‌رى نه‌وت و كانزاكانى گه‌رمیان، ئاماژه‌ى به‌وه‌شكردوه‌: ئه‌و رێكاره‌ سه‌ركه‌وتو نه‌بوه‌، بۆیه‌ بڕیار دراوه‌ ئه‌م مانگه‌ له‌ رێگه‌ى بریكاره‌كانى غازه‌وه‌ به‌سه‌ر ماڵان دا دابه‌ش بكرێت به‌شێوه‌یه‌كى یه‌كسان.

 

قه‌یرانى غازی شل، نرخی غازى له‌ بازاڕدا گران كردوه‌ و رۆژانه‌ یه‌ك بوتڵ غاز به‌ 13 بۆ 14 هه‌زار ده‌فرۆشرێت.