ده‌نگ نێت

 

له‌ ناحیه‌ى سه‌رقه‌ڵا كه‌ ده‌وڵه‌مه‌ندترین ناحیه‌ى سنورى ئیداره‌ى گه‌رمیانه‌، كێشه‌ى خراپی قوتابخانه‌كان هه‌یه‌، به‌شێوه‌یه‌ك له‌ گوندێكى ئه‌و ناحیه‌یه‌ كه‌ گه‌وره‌ترین بيرى نه‌وتى لێیه‌، به‌هۆی نه‌بونى بیناوه‌، پۆله‌كان تێكه‌ڵ كراون و كاتى وانه‌كان كورت كراونه‌ته‌وه‌.

 

عه‌بدولقادر ئیبراهیم، به‌ڕێوبه‌رى قوتابخانه‌ى حه‌سیره‌ى بنه‌ڕه‌تى  له‌ ناحیه‌ى سه‌رقه‌ڵا، له‌ دواین راپۆرتى یه‌كه‌ى چاودێری حكومه‌تى خۆجێی گه‌رمیانى سه‌ر به‌ رادیۆی ده‌نگ ده‌ڵێت: له‌ پۆلى 1 بۆ 9ی بنەڕەتیمان هه‌یه‌ كه‌ 67 قوتابین، ناچاربوین به‌هۆى كه‌مى ژور پۆلى  1و2  تێكه‌ڵ بكه‌ین  له‌گه‌ڵ 4 و5، كه‌ هه‌ر پۆلێكیان 20 خوله‌ك ده‌خوێنن، ئه‌مه‌ش كاریگه‌رى خراپى هه‌بوه‌ له‌سه‌ر پرۆسه‌ى خوێندن.

 

ئه‌مه‌ش له‌كاتێكدایه‌ ئه‌و گونده‌ یه‌كێكه‌ له‌ گونده‌ "ده‌وڵه‌مه‌نده‌كانى" سنورى گه‌رمیان و به‌ به‌رهه‌مترین بيره نه‌وتیه‌كانى گه‌رمیان له‌وێدایه‌.

 

ناحیه‌ى سه‌رقه‌ڵاى سه‌ر به‌ قه‌زاى كفری، چوار بير/كێڵگه‌ى نه‌وتی تێدایه‌ كه‌ كۆمپانیای گازپرۆم نه‌فتی روسی وه‌به‌رهێنانى تێدا ده‌كات، به‌رهه‌مى نه‌وتى رۆژانه‌شى له‌نێوان 25-30 هه‌زار به‌رمیله‌..