دەنگ نێت

 

ئه‌مڕۆ (دوشه‌مه‌) وەبەرھێنەری پرۆژەی 'قەڵای شێروانە' لە کەلار دەستگیر کرا، لەسەر سکاڵایەکی شارەوانی.

 

عەلی جەمال، وتەبێژی پۆلیسی گەرمیان، جەختی لە ھەواڵەکە کردەوە و بە رادیۆی دەنگی وت: لەسەر سکاڵای سەرۆکایەتی شارەوانی ناحیەی رزگاریی سەر بە کەلار، وەبەرھێنەری پرۆژەی نیشتەجێبونی قەڵای شێروانە، عەباس محەمەد، دەستگیر کراوە و بە فەرمانی دادوەر راگیراوە.

 

وتیشی: سەرۆکی شارەوانی رزگاری سکاڵای لەسەر ئەو وەبەرھێنەرە تۆمار کرد بەهۆی سیاج کردنی زەوی پرۆژەکە کە بەر زەوی شارەوانی کەوتوە.

 

باسی لەوەشکرد: لە پارەوە ئاگادار کراوەتەوە لە لادانی ئەو زیادەڕۆییە، بەڵام لای نەبردوە، بەوھۆیەوە شارەوانی رزگاری سکاڵای لەسەر تۆمار کردوە و ئەمڕۆش دادوەری لێکۆڵینەوەی رزگاری بڕیاری راگرتنی "توقیف" داوە.

 

پرۆژەی (قەڵای شێروانە) کە دەکەوێتە  نێوان قه‌زاى کەلار و ناحیه‌ى رزگاریی، لە ھەزار و ١١٢ یەکەى نیشته‌جێبون پێکدێت و له‌لایه‌ن كۆمپانیای گاردینیاوه‌ جێبه‌جێ ده‌كرێت، پێشتریش كێشه‌ له‌نێوان خاوه‌نى پرۆژه‌كه‌ و به‌ڕێوبه‌رى جێبه‌جێكارى پرۆژه‌كه‌ دروستبو له‌سه‌ر مه‌سه‌له‌ى پشك و هاوبه‌شى.