دەنگ نێت

 

بڕیارە سبەی تیروپشکی پرۆژەی یەکەی نیشتەجێبونی فەرمانبەرانی گەرمیان ئەنجام بدرێت و کۆمپانیای جێبەجێکاری پرۆژەکەش سەروی ٢٠٠ یەکەی لای خۆی گلداوەتەوە و دابەشیان ناکات.

 

ھونەر مەحمود، بەڕێوبەری وەبەرھێنانی گەرمیان، بە رادیۆی دەنگی وت: سبەی تیروپشکی یەکەکانی پرۆژەی فەرمانبەران ئەنجام دەدرێت.

 

ئەو پرۆژەیە کەلەلایەن کۆمپانیای سەگرمەوە ئەنجام دەدرێت، ژمارەی ٢٨٩٠ یەکەیە، کە ١١٠٥ یەکەیان خانوی سەروی ٢٠٠ مەترین و ٧٨٦ یەکەیان خانوی ١٨٠ مەترین، ٨٠٠ یەکەیان شوقە و ٢١٧ یەکەشیان ڤێلایە.

 

بەپێی زانیارییەکان، لەو ژمارە یەکەیە، سبەی ٢٠٨ یەکەیان ناخرێنە تیروپشکەوە کە ئەمەش دەکاتە ١٠٪‏ـی کۆی رێژەی یەکەکان.

 

ھونەر مەحمود، جەختی لەو زانیارییە کردەوە و وتی: ئەو ١٠٪‏ـە لای کۆمپانیایە و بۆ فەرمانبەران نیە.

 

وتیشی: ئەو رێژەیە کۆمپانیا ئازادە لەگەڵ چ چین و توێژێکی دیکە رێک دەکەوێت و پێان دەفرۆشێتەوە.

 

ئەمەش یەکەمجارە لە پرۆژەیەکی نیشتەجێبونی 'لۆوکۆست' لە گەرمیان بەشێکی یەکەکانی دەدرێتە کۆمپانیا کە خۆی مامەڵەی پێوە بکات، لەکاتێکدا پرۆژەکان بە ناوی چین و توێژەوەن.

 

پرۆژەکانی یەکەی نیشتەجێبونیش لە گەرمیان جگە لە بونی کێشەی زۆر لە جێبەجێکردن دا، ھاوکات گومانی زۆریشیان لەسەرە بەوەی حزب و بەرپرسە حزبییەکان شەریکیانن و بۆ قازانجی خۆیان بەکاری دێنن، پێشتریش رادیۆی دەنگ نوسراوێکی مەڵبەندی گەرمیانی یەکێتی نیشتمانی دەستکەوت و ناوەڕۆکەکەی بڵاوکردەوە کە باس لەوە دەکات بڕی ٨٪‏ـی قازانجی پرۆژەکانی نیشتەجێبونی سنورەکە دەدرێت بە ئیدارەی گشتی یەکێتی.