ده‌نگ نێت

 

دواى ئه‌وه‌ى به‌ڕێوبه‌رى شاره‌وانیه‌كانى گه‌رمیان، به‌ڕێوبه‌رى نه‌خشه‌دانانى به‌وه‌ تۆمه‌تباركرد كه‌ به‌مه‌به‌ست نه‌خشه‌ى ناوچه‌ى پیشه‌سازى رزگارى په‌سه‌ند نه‌كردوه‌، به‌ڕێوبه‌رى نه‌خشه‌دانانى گه‌رمیانیش ده‌ڵێت: پێش ئه‌وه‌ى وه‌ڵامى وه‌زاره‌ت بگه‌ڕێته‌وه‌ بۆ په‌سه‌ندكردنى نه‌خشه‌كه‌ ده‌ستیان به‌كاركردن كردوه‌ تێیدا.

 

دواى ئه‌وه‌ى له‌سه‌ر دۆسیه‌ى ناوچه‌ى پیشه‌سازى رزگارى هه‌ریه‌كه‌ له‌ سه‌رۆكى شاره‌وانى ناحیه‌ى رزگارى و به‌ڕێوبه‌رى گشتى شاره‌وانیه‌كانى گه‌رمیان فه‌رمانى گرتنیان بۆ ده‌ركراو ده‌ستگیركران، به‌ڕێوبه‌رى گشتى شاره‌وانیه‌كانى گه‌رمیان به‌ڕێوبه‌رایه‌تى نه‌خشه‌دانانى ئاوه‌دانى گه‌رمیانى تۆمه‌تباركرد به‌وه‌ى كه‌  بۆ ماوه‌ى ٩٦ رۆژ نوسراوه‌كه‌ى هێشتوه‌ته‌وه‌ و ته‌نها مه‌به‌ستیش ئه‌وه‌بو به‌ دادگا بڵێت ئه‌وه‌ زیاده‌رۆیی كراوه‌.

 

له‌ به‌رامبه‌ردا، كاروان محه‌مه‌د، به‌ڕێوبه‌رى به‌ڕێوبه‌رایه‌تى نه‌خشه‌دانانى ئاوه‌دانى گه‌رمیان له‌مباره‌یه‌وه‌ بۆ رادیۆى ده‌نگ وتى: "پێش ئه‌وه‌ى ئێمه‌ وه‌ڵامى وه‌زاره‌تمان بۆ بگه‌ڕێته‌وه‌ بۆ په‌سه‌ندكردنى نه‌خشه‌كه‌ ئه‌وان ده‌ستیان به‌كاركردن كردوه‌ له‌و جێگه‌یه‌ به‌ سه‌رپێچى".

 

وتیشى: دواى ئه‌وه‌ى له‌ 14ى 1 دادگا داواى لێكردین سه‌باره‌ت به‌ دروستكردنى ئه‌و كارگه‌یه‌ چۆن كراوه‌ له‌ وه‌ڵامدا وتمان ئاگامان لێى نیه‌، وه‌ له‌ 27ى1 وه‌زاره‌تمان وه‌ڵامى داینه‌وه‌.

 

باسى له‌وه‌شكرد: كه‌ وه‌ڵامى وه‌زارتمان بۆ هاته‌وه‌ نوسراومان ئاراسته‌ى دادگا كرد سه‌باره‌ت به‌ په‌سه‌ندكردنى نه‌خشه‌كه‌ له‌ 3ى 5 پێى راگه‌یاندین په‌سه‌ندى بكه‌ین له‌ 4ى5 نه‌خشه‌كه‌مان په‌سه‌ند كرد.

 

له‌باره‌ى ئه‌وه‌ى به‌مه‌به‌ست ئه‌و په‌سه‌ندكردنه‌ دواخرابێت، كاروان محه‌مه‌د، وتیشى: بۆ به‌ مه‌به‌ست ئه‌مه‌ كرابێت له‌ كاتێكدا دۆسیه‌كه‌ له‌ دادگایه‌، ئه‌ندامێكى ئه‌نجومه‌ن سكاڵاكه‌ى كردوه‌ دژیان.