رادیۆی دەنگ

 

نەدانی موچەی دو مانگی رابردوی ئەمساڵ، كاری كردوەتە سەر بازاڕی پیشەوەرانی ناوچەی پیشەسازیی كەلاریش، پیشەوەرێک دەڵێت: هێندە بێ بازاڕین رۆژانە  ئەگەر ئۆتۆمبیلێک سەردانمان بكات.

 

نزیکەی 70 رۆژە کە فەرمانبەرانی هەرێم موچەیان وەرنەگرتوە، ئەمەش نەک بەتەنها کاری لە دۆخی موچەخۆران کردوە، بەڵکو کاری لە بازاڕیش کردوە و لاوازی کردوە، لە نێویشدا بازاڕی پیشەوەرانی ناوچەی پیشەسازیی.

 

‎محەمەد حەسەن، پیشەوەر لە ناوچەی پیشەسازیی كەلار، بۆ رادیۆی دەنگ وتی: ئەم بێ موچەییە كاریگەری زۆری هەبوە بەسەر بازاڕمانەوە و زۆر سستی كردوە، هەفتەی وا هەیە هیچ ئیشمان نیە، بەڵام پێش بێ موچەیی بازاڕ زۆر باش بو.

 

دەشڵێت: كاریگەرییەکە بەجۆرێکە کە پێشوتر رۆژی واهەبوە 20 ئۆتۆمبیل سەردانی دەكردین، بەڵام ئێستا دانەیەك ئەگەر هەبێت، ئەمەش بەحوكمی ئەوەی زۆربەی خاوەن ئۆتۆمبیلەکان موچەخۆرن و پارەی چاككردنەوەی ئۆتۆمبێلەكانیان پێ نییە.