رادیۆی دەنگ

 

بەڕێوبەری ناحییەی کۆکس لەبارەی بڕیاری بەقەزاکردنی قەرەتەپە و خستنەسەری ناحییەی کۆکس بۆ قەزاکە دەڵێت: ناحییەی ئێمە سەر بەوان نییە و بڕیارەکەش سیاسییە.

 

پێرێ رادیۆی دەنگ بڵاویکردەوە کە حکومەتی عێراقی بڕیاریداوە ناحییەی قەرەتەپە بکات بە قەزا و جگە لە خودی ناحییەکە، ناحییەکانی جەبارە و کۆکسیشی بخاتەسەر.

 

لەبارەی ئەو هەنگاوەوە، ساڵح محەمەد، بەڕێوبەری ناحییەی کۆکس، بۆ رادیۆی دەنگ وتی: ئێمە هەر ئاگامان لێنەبوە ناحیەکەمان خراوەتە سەر قەرەتەپە، قسەشمان لەگەڵ سەروی خۆمان کردوە تاوەکو هەفتەی داهاتو وەڵام دەدەینەوە.

 

وتیشی: هیج پەیوەندییەکمان بەوانەوە نییە، ناحییەکەی ئێمەش سەر بەوان نییە، کاتی خۆی کە دروستکراوە سەربە کفری بوە، لەژێر کاریگەریی هەندێک عەرەبی شۆڤێنی ئەم بڕیارە دراوە.

 

دەشڵێت: پێشمانوایە ئەم بڕیارە بڕیارێکی سیاسییە و دژی کوردە، بەپێچەوانەوە بڕیارەکە بەهیچ شێوەیەک ئیداریی و یاسایی نییە.

 

زیاتر وتی: بەڵکو بڕیارەکە تەجاوزی سەڵاحیاتە و وەزیری پلاندانی عێراق ئەمەی کردوە، لەکاتێکدا دەبێت پەرلەمان بڕیاری ئەوە بدات، تەنانەت شێوازە ئیدارییەکەی نایاساییە.