رادیۆی دەنگ

 

بەڕێوبەری جێبەجێکردنی کەلار 'تنفیذ' دەڵێت: کارێکی زۆری هاوڵاتیانمان لایە و بەهۆی کەمی ژمارەی فەرمانبەرەوە ناتوانین رایی بکەین.

 

بەشێک لە هاوڵاتیان گازندەی ئەوە دەکەن کە کارەکانیان لە فەرمانگەی جێبەجێکردنی کەلار 'تنفیذ' ناڕوات و زۆری پێدەچێت، بەڕێوبەرەکەشی هۆکارەکەی دەخاتەڕو.

 

سۆران ئەحمەد، بەڕێوبەری فەرمانگەی جێبەجێکردنی کەلار، بەرادیۆی دەنگی راگەیاند: لەئێستادا فەرمانبەران بایکۆتیان کردوە بۆیە کاری هاوڵاتیان پەکیکەوتوە، بەڵام پێشتریش کێشەی کەمی فەرمانبەرمان هەبو.

 

وتیشی: ٨ فەرمانبەرمان هەیە و کارێکی زۆری هاوڵاتیانمان لەسەرە، داواشمان کردوە و لایەنە پەیوەندیدارەکان لەهەوڵدان بۆ دابینکردنی فەرمانبەر.

 

دەشڵێت: ئەگەر ژمارەی کارمەندانمان بکرێتە نزیکەی ۱٥ فەرمانبەر، ئەوکات کاری هاوڵاتیان پەکیناکەوێت.

 

فەرمانگەی جێبەجێکردنی کەلار فەرمانگەیەکی سەر بە وەزارەتی دادە و پەیوەندیدارە بەکاری جێبەجێکردنی بڕیارەکانی دادگا لەنمونەی بژاردنی قەرز و قەرەبو و بژێوی "نفقە" و… هتد.