رادیۆی دەنگ

 

بەڕێوبەری فەرمانگەی ژینگەی گەرمیان دەڵێت: هیچ ئامێرێکی پشکنینی پیسبونی هەوا بە تیشکدانەوە ئەتۆمییەکان، لە گەرمیان دانەنراون.

 

د. دورەید سەلیم، بەڕێوبەری فەرمانگەی ژینگەی گەرمیان، بۆ رادیۆی دەنگ وتی: لە گەرمیان هیچ جۆرە ئامێرێک بونی نیە بۆ تۆمارکردنی تیشکدانەوەی تەقینەوەی ئەتۆم، بەڵام لەچەند شوێنێکی دیکەدا هەیە.

 

وتیشی: ئامێرەکان تەنها لە هەولێر، سلێمانی، دهۆک، رانیە و زاخۆ دانراون، پێش نزیکەی دەیەیەکە لەلایەن وەزارەتی ژینگەی عێراقەوە دانراون.

 

دەشڵێت: ناتوانم هیچ شتێک بڵێم لەسەر ئەوەی ئایا کێڵگە ئەتۆمییەکانی ئێران گەر توشی تەقینەوە یان تیشکدانەوە بن چ گرفتێک دروست دەبێت و ژینگەی گەرمیان چی لێدێت، چونکە پسپۆڕی بوارەکە نیم، بەڵام بۆ زانینی رێژەکەشی لەحاڵەتی تەقینەوە بۆمبە ئەتۆمییەکاندا، هیچ پێوانەیەکمان نییە و بەم دەمودەستەش ناگاتە دەستمان، چونکە کارەکە لەلای عێراقە.

 

بەرەبەیانی ئەمڕۆ ویلایەتە یەکگرتوەکانی ئەمریکا لە رێگەی فرۆکەی جەنگییەوە بنکە ئەتۆمییەکانی فۆردۆ، نەتەنز و ئیسفەهانی لە ئێران کردە ئامانج کە کاری پیتاندنی یۆرانیۆمیان تێدا دەکرا.

 

لەبارەی لێکەوتەکانی روداوەکە لە دروستبونی تیشکدانەوە، وتەبێژی دەستەی ژینگەی هەرێم رایگەیاند: هیچ تیشکدانەوەیەک لە هەرێمی کوردستان تۆمار نەکراوە.

 

د. سەنعان عەبدوڵڵا، وتیشی: تاوەکو ئێستا لە ئامێری پشکنین و تۆمارکردنی پیسبوونی ژینگە بە تیشکدانەوە ئەتۆمییەکان، هیچ تیشکدانەوەیەک تۆمار نەکراوە.