‌

رادیۆی دەنگ

 

لەکاتێکدا بەشدارانی پرۆژەی قەڵای شێروانە سیتی بەردەوام ناڕەزایەتی دەردەبڕن لەبارەی تەواونەکردنی پرۆژەکەیانەوە، دەستەی وەبەرهێنان، مۆڵەتی تەواوکردنی بۆ ماوەی ساڵ و نیوێک درێژدەکاتەوە.

 

بەپێی نوسراوێک کە واژوی د.محەمەد شوکری، سەرۆکی دەستەی وەبەرهێنانی لەسەرە، پرۆژەی قەڵای شێروانە سیتی کە کۆمپانیای گاردینیا جێبەجێکارێتی، مۆڵەتی ساڵ و نیوێکیان بۆ درێژکراوەتەوە.

 

بەپێی نوسراوەکه درێژکردنەوەی مۆڵەتەکە، لە رێکەوتی ٥ـی ۳ـی ۲۰۲٥ـەوە دەستپێدەکات و لە رێکەوتی ٥ـی ۹ـی ۲۰۲٦ کۆتایی پێدێت.

 

پرۆژەی قەڵای شێروانە سیتی لە ناحیەی رزگاریی سەر بە قەزای کەلارە، لەلایەن کۆمپانیای گاردینیاوە جێبەجێ دەکرێت و  لە رێکەوتی ۱ـی ۱۰ـی ۲۰۱۹ـەوە مۆڵەتی لە دەستەی وەبەرهێنان وەرگرتوە.

 

پرۆژەکە چەندین کێشەی هەیە و بەشدارانی بە بەردەوامی ناڕەزایەتی و گردبونەوە ئەنجام دەدەن دژ بە تەواونەکردنی یەکەکان و خزمەتگوزارییەکانی ناوی.