رادیۆی دەنگ

 

بەپێی فەرمانێکی ئەنجومەنی وەزیران، بڕیارە بەڕێوبەری گشتی تەندروستی گەرمیان بگۆڕدرێت و لە جێگەی د. سیروان محەمەدـی بەڕێوبەری ئێستا، د. محەمەد ئازاد دەستبەکاربێت.

 

بەپێی زانیارییەکانی رادیۆی دەنگ، پۆستەکە هەر لای بزوتنەوەی گۆڕان دەمێنێتەوە، بەوپێیەی بەڕێوبەری نوێ کاندیدی مەکۆی کەلاری بزوتنەوەکە بوە و لەساڵی پارەوە نوسراوی دەستبەکاربونی بۆ بەرزکرابوەوە.

 

بڕیارە لەم رۆژانەدا دەستاودەستکردنی پۆستەکە بە ئامادەبونی نوێنەرانی وەزارەتی تەندروستی بەڕێوەبچێت.

 

د. سیروان محەمەد (لای چەپی وێنەکە)، لە ساڵی ٢٠١٥ و لەچوارچێوەی رێککەوتنی گۆڕان و یەکێتی و یەکگرتو و کۆمەڵ بۆ دابەشکردنی پۆستەکانی حکومەتی خۆجیی سلێمانی، وەکو بەڕێوبەری گشتی تەندروستی گەرمیان دەستبەکاربو کە یەکێک بو لەو ٩ پۆستەی گۆڕان لە سنوری گەرمیاندا وەریگرت.

 

د. محەمەد ئازاد (لای راستی وێنەکە)، پزیشکی دەرمانسازە و بەڕێوبەری کۆگای دەرمانی بەڕێوبەرایەتی گشتی تەندروستی گەرمیانە و پێشتریش بۆ ماوەیەک بەڕێوبەری نەخۆشخانەی شەهید شێرەی نەقیب بوە لە کەلار.