رادیۆی دەنگ

 

دواى چه‌ندین ساڵ وێستگه‌یه‌كى كارەبای گەڕۆک "مۆبایل" ‌ بۆ ناحیه‌ى باوه‌نورـی سەر بە کەلار دابینكراوە، به‌ڵام تاوه‌كو ئێستا نه‌خراوه‌ته‌ كار، سه‌رچاوه‌یه‌ك له‌ بەڕێوبەرایەتی كاره‌باى گه‌رمیانیش ده‌ڵێت: هۆكاره‌كه‌ى نه‌بونى فه‌رمانبه‌ره‌.

 

به‌پێى وته‌ى سه‌رچاوه‌یه‌ك له‌ به‌ڕێوبه‌رایه‌تى گشتى كاره‌باى گه‌رمیان كه‌ بۆ رادیۆى ده‌نگ قسەی کرد، ماوه‌ى مانگێكه‌ وێستگەیه‌كى مۆبایلی کارەبا بۆ ناحیه‌کە دابینكراوه‌، به‌ڵام تاوه‌كو ئێستا كاریپێنه‌كراوه‌.

 

ده‌شڵێت: هۆكاره‌كه‌یش نه‌بونى فه‌رمانبه‌ره‌ كه‌ پێویستى به‌ 10 فەرمانبەر و كارمه‌ند دەبێت.

 

جه‌ختى له‌وه‌شكرده‌وه‌: داوامان كردوه‌ له‌ ئه‌نجومه‌نى وه‌زیران بۆ ئه‌وه‌ى فه‌رمانبه‌رمان بۆ دابینبكه‌ن، بەڵام نه‌یانكردوه‌، له‌ كاتێكدا زۆر پێویسته‌ و هه‌رچى كێشه‌ى كاره‌باى ناحیه‌كه‌یه‌ چاره‌سه‌ر ده‌كات.

 

ئاماژەی بەوەشدا: له‌گه‌ڵ ئه‌وه‌شدا داوامان كردوه‌ له‌سه‌ر داهاتى خۆمان و به‌ كرێى رۆژانە کارمەندی‌ بۆ دابینبكرێت، بەڵام رەزامەندی لەسەر ئەوەش نەدراوە.