رادیۆی دەنگ

 

بەهۆی کێشەی دەستشکانەوەی ئۆتۆمبێلەوە، لە قەزای کەلار شەڕ لەنێوان چەند گەنجێکدا دروست دەبێت، بەوهۆیەوە فیشەک لە گەنجێک دەدات و بریندار دەبێت، لەسەر روداوەکەش فەرمانی گرتن بۆ ٤ کەس دەردەچێت کە یەکێکیان کارمەندی هێزەکانی ئاسایشە.

 

بەپێی زانیارییەکانی رادیۆی دەنگ، درەنگانی شەوی رابردو لە گەڕەکی شەهیدانی قەزای کەلار، ۳ کەس لەگەڵ هاوڵاتییەک دەبێت بە شەڕیان و لەئەنجامدا تەقەی تێدەکەوێت و فیشەک بەر دەستی کەسەکە دەکەوێت.

 

هەر بەپێی زانیارییەکان، روداوەکە لەسەر دەستشکاندنەوەی ئۆتۆمبیل بوە، کە بەهۆیەوە شەڕەکە رویداوە.

 

لە ئێستاشدا بریندارەکە کە کوڕی خاوەنکارێکی کەلارە، سکاڵای لەسەر سێ کەسەکە و کەسێکی دیکەش تۆمارکردوە کە ئەفسەری ئاسایشە، بەڵام تائێستا دەستگیر نەکراون.