رادیۆی دەنگ

 

پاش دەستگیرکردنی کەسێک بەتۆمەتی سوتاندنی ۳ بارهەڵگر لە ماوەی دو رۆژدا، بەپێی زانیارییەکانی رادیۆی دەنگ درەنگانی شەوی رابردو دو کەسی دیکەش دەستگیرکراون.

 

لە ٢ رۆژدا لە قەزای کەلار ٣ بارهەڵگر لە گەڕەکەکانی گۆران و شەهیدان و کەلاری کۆن سوتێنران، ئەمە جگە لەوەی هەوڵدراوە بۆ سوتاندنی چەند بارهەڵگرێکی دیکە، بەڵام لەلایەن هاوڵاتیەوە ئاگرەکان کۆنترۆڵکرابون.

 

شەوی رابردو قایمقامی قەزای کەلار لە کۆنگرەیەکی رۆژنامەوانیدا رایگەیاند: کەسێکیان دەستگیرکردوە بەتۆمەتی سوتاندنی ئەو بارهەڵگرانە، کە تەمەنی ۱۹ ساڵە و بەپێی لێکۆڵینەوە سەرەتاییەکان باری دەرونی تەواو نییە.

 

بەپێی زانیارییەکانی رادیۆی دەنگ، جگە لەو کەسەی دەستگیر کراوە، درەنگانی شەوی رابردو لەلایەن پۆلیسەوە دوکەسی دیکەش بە هەمان تۆمەت دەستگیرکراون و بە بڕیاری دادوەر هەرسێکیان راگیراون و لێکۆڵینەوەیان لەگەڵدا دەکرێت.