رادیۆی دەنگ

 

دەسەڵاتدارانی ئێران ئاستەنگ بۆ هاتوچۆی بارهەڵگرەکانی دیوی عێراق لە دەروازەی پەروێزخان دروستدەکەن، سەرچاوەیەک دەڵێت: پارەیان دەوێت، هاوکات ناکۆکیش لەنێوان بەرپرسانی دەروازەکە هەیە.

 

دو سەرچاوەی ئاگادار بە رادیۆی دەنگیان وت: ماوەی زیاتر لە ٢ هەفتەیە دەسەڵاتدارانی ئێرانی ئاستەنگ بۆ هاتوچۆی بارهەڵگرانی دیوی عێراق لە دەروازەی پەروێزخان دروستدەکەن، ئاستەنگییەکانیش خۆی دەبینێتەوە لە درەنگ راییکردنی مامەڵەی شۆفێران و درەنگ رێگەدان بە هاتوچۆیان و خاویی ئەنجامدانی پشکنین بۆیان.

 

بەوتەی ئەو سەرچاوانە، رێگرییەکان لە بیانو دەچن وەک لەوەی رێکاری یاسایی بن، ئەمەش بۆ ئەوەیە پارەیان پێبدرێت.

 

ئاماژەیان بەوەشکرد: لە دیوی عێراقدا کێشە هەیە لەنێوان ئیدارە و ئاسایشی دەروازەکە لەبارەی دانانی کەسێک وەکو نوێنەر لەلایەن ئیدارەی دەروازەکەوە کە لەلایەن ئاسایشەوە رەتکراوەتەوە و داوای گۆڕینی دەکرێت.