رادیۆی دەنگ

 

هاوڵاتیه‌ك له‌ به‌ڕێوبه‌رایه‌تى هاتوچۆى گه‌رمیان به‌ هه‌میشه‌یی دامه‌زراوه‌ كه‌ دانیشتوى ده‌ربه‌ندیخانه‌، وته‌بێژى هاتوچۆى گه‌رمیانیش ده‌ڵێت: فه‌رمانى سه‌ره‌وه‌ى خۆمان جێبه‌جێ كردوه‌.

 

هاوڵاتیه‌ك كه‌ دانیشتوى قه‌زاى ده‌ربه‌ندیخانه‌ و بڕوانامه‌ى سه‌ره‌تایی هەیە‌ و ناوى له‌لاى رادیۆى ده‌نگ پارێزراوه‌، له‌ ١٠ـی شوباتی ٢٠٢٥ـەوە لەبه‌ڕێوبه‌رایه‌تى هاتوچۆى گه‌رمیان وەکو کارمەندی "پۆلیس" هه‌میشه‌یى دامه‌زراوه‌، ئه‌مه‌ش له‌ كاتێكدایه‌ کە دامەزراندن راگیراوە و قه‌زاى ده‌ربه‌ندیخانیش لەسەر ئیدارەی گەرمیان نییە.

 

له‌ به‌رامبه‌ردا، سامان عه‌لى، وته‌بێژى به‌ڕێوبه‌رایه‌تى هاتوچۆى گه‌رمیان، بۆ رادیۆى ده‌نگ وتى: ئەو کەسە به‌ فه‌رمانى وه‌زاره‌تى ناوخۆ دامه‌زراوه‌ و فه‌رمان هاتوه‌ بۆ ئێمه‌، ئه‌وه‌شى له‌سه‌ر ئێمه‌یه‌ ته‌نها فه‌رمانه‌كه‌ جێبه‌جێ ده‌كه‌ین.

 

ده‌شڵێت: هیچ زانیارییه‌كى نه‌هاتوه‌ته‌ لاى ئێمه‌ و له‌لاى ئێمه‌شه‌وه‌ داواکاری بۆ به‌رز نه‌كراوه‌ته‌وه‌، ئه‌وه‌ى هاتوه‌ته‌ لاى ئێمه‌ فه‌رمانى ده‌ستبه‌كاربونیه‌تى.

 

جه‌ختى له‌وه‌شكرده‌وه‌: فه‌رمانه‌كه‌ له‌ مانگى ١٠ـی ساڵى رابردوه‌وه‌ هاتوه‌ته‌ لاى ئێمه‌ و به‌ڕێوبه‌رى هاتوچۆى گه‌رمیانیش دوایخستوە لەجێبەجێکردن، به‌ڵام دواجار فه‌رمانى جێبه‌جێ كردوه‌.