رادیۆی دەنگ

 

لە وەڵامی ئەوەی بۆچی زۆرێک لەوانەی کە داردەبڕنەوە لەلایەن ئاسایشەوە دەستگیر دەکرێن، وتەبێژی پۆلیسی دارستانی گەرمیان دەڵێت: لە دارستانەکان خاڵی چاودێریی جێگیرمان نییە.

 

بەپێی بڵاوکراوەکانی بەڕێوبەرایەتی پۆلیسی دارستانی گەرمیان، ئەو کەسانەی کە دار دەبڕن لە شوێنی سەرپێچیکردنەکەیان دەستگیر ناکرێت و پاش ئەنجامدانی کارەکە لەلایەن ئاسایشەوە لە بازگەکان دەستگیر دەکرێن.

 

هاشم عەلی، وتەبێژی بەڕێوبەرایەتی پۆلیسی دارستانی گەرمیان، لەبارەی هۆکارەکەیەوە بۆ رادیۆی دەنگ وتی: لە هەندێک کاتدا مەفرەزەکانمان لەوانەیە ئەو کەسانە نەبینن کە دار دەبڕنەوە، ئیتر لە بازگەکانی ئاسایش دەگیرێن، چونکە خاڵی چاودێریمان نییە لە نزیک دارستانەکان، بەکۆمەڵێک هۆکار.

 

وتیشی: قەیرانی دارایی و نەبونی سوتەمەنی پێویست بۆ ئۆتۆمبێلەکان و کەمی میلاک، وایکردوە مەفرەزە لە هەندێک لە شوێنەکان دانەنەین، بەڵام لەگەڵ ئەوەشدا مەفرەزەکانمان دەردەچن و "قسوریان نەکردوە"، ئەمە جگە لەوەی هەندێک جاریش زانیاریمان بۆ دێت و مەفرەزەکانمان بە دەم حاڵەتەکەوە دەچن.