دەنگ نێت

 

بڕیاری تەنسیبکردنی ۱۷۰ فەرمانبەری عێراق بۆ بەڕێوبەرایەتی تەندروستی گەرمیان ناڕەزایەتی لێدەکەوێتەوە، پارلەمانتارێک کە لە پشت ئەم هەوڵەیە دەڵێت: ویستومانە کێشەی تەندروستی گەرمیان چارەسەربکەین، دەرچویەکی دانەمەزراویش دەڵێت: تەنسیکردنی ئەم کارمەندانە دامەزراندنی ئێمە دەخاتە کاتێکی نادیارەوە.

 

لەچەند رۆژی رابردودا بەڕێوبەرایەتی گشتی تەندروستی گەرمیان رایگەیاند کە بە هەوڵی پارلەمانتاری عێراق- سروە محەمەد، رێکارەکانی تەنسیبکردنی ١٧٠ فەرمانبەری تەندروستی لە دیالەوە بۆ گەرمیان دەستیپێکردوە.

 

دوابەدوای ئەم هەواڵە، دەرچوانی بەشە تەندروستییەکان و کارمەندانی خۆبەخش لە سنوری بەڕێوبەرایەتی تەندروستی گەرمیان ناڕەزایەتییان دەربڕی و پێیانوایە ئەو کارە بە زیانی ئەوان دەشکێتەوە.  

 

محەمەد فوئاد، دەرچوی دانەمەزراو، بەرادیۆی دەنگی راگەیاند: کارمەند هەیە لە فریاکەوتنی کەلار چەندین ساڵە خۆبەخشە، ئەم تەنسیبکردنە وادەکات ئەم کارمەندانە دانەمەزرێن.

 

دەشڵێت: تەنسیبکردنی ئەو ژمارە فەرمانبەرە لە خانەقینەوە بۆ کەلار زیاندەگەیەنێت بە دامەزراندنی سێ بۆ چوار هەزار کەس، چونک لەوانەیە تەنسیبەکە درێژبکرێتەوە و ئەمەش وادەکات دامەزراندنی دەرچوانی دانەمەزراو و خۆبەخشان دوابخات.

 

لەبەرامبەردا، سروە محەمەد، پارلەمانتاری عێراق، بەرادیۆی دەنگی راگەیاند: سەردانی نەخۆشخانەکانی گشتی کەلار و فریاکەوتنی کەلارم کرد، کەمی میلاکیان هەبو، منیش قسەم لەگەڵ وەزیری تەندروستی عێراقدا کرد و ئەو ژمارە فەرمانبەرانەمان بەتەنسیب هێنایە گەرمیان.

 

وتیشی: ئەو کەسانەی کە تەنسیبکراونەتە سەر بەڕێوبەرایەتی تەندروستی گەرمیان خەڵکی خانەقین و قەرەتەپەو جەبارەن و دامەزراون لەسەر حکومەتی عێراق و بۆ ماوەی ساڵێک تەنسیبکراون بۆ گەرمیان.

 

باسی لەوەشکرد: تەنسیبکردنی ئەم کارمەندانەی حکومەتی عێراق هیچ پەیوەندییەکی نییە بە دامەزراندنی خۆبەخشان و دەرچوانی دانەمەزراو، حکومەت بڕیاری دامەزراندن بدات ئەولەویەت بۆ خۆبەخشەکانە.

 

بەڵام محەمەد فوئاد وایدەبینێت کە شوێنی خۆبەخشەکانی تەندروستی بەم فەرمانبەرە تەنسیبکراوانە پڕدەکرێتەوە، دەشڵێت: ئەمەش دامەزراندنی کارمەندانی خۆبەخش و دەرچوانی دانەمەزراو دەخاتە کاتێکی نادیارەوە.

 

بەڵام سروە محەمەد لە بەرامبەردا دەڵێت: من ویستومە کێشەی تەندروستی لەگەرمیان چارەسەر بێت، کەچی ئێستا بوە بەبابەتی دامەزراندن، حکومەتی هەرێم بیەوێت خۆبەخشەکان دابمەزرێنێت تۆ بڵێی ئەوانەی تەنسیبکراون دەستی حکومەت ببەستنەوە؟