دەنگ نێت

 

دوای ئەوەی بەڕێوبەرایەتی وەبەرهێنانی گەرمیان بڵاویکردەوە کە هەندێک پرۆژەی نیشتەجێبونیان مۆڵەتی دەستەی وەبەرهێنانی بۆ گەڕاوەتەوە لە کاتێکدا ئەو پرۆژانە لە کاردان، وتەبێژی بەڕێوبەرایەتیەکە رونکردنەوە دەدات دەڵێت: کارکردنیان یاساییە.

 

بەڕێوبەرایەتی گشتی وەبەرهێنانی گەرمیان لە راگەیەندراوێکیاندا باسیان لەوەکردوە، هەریەکە لە پرۆژەکانی باخی خورمای بەحری و پرۆژەی نیشتەجێبونی هیواستی و پرۆژەی رۆیاڵ ستی، مۆڵەتی ئەنجومەنی باڵای وەبەرهێنانیان بۆ هاتوەتەوە، لە کاتێکدا ئەم پرۆژانە پێشتر دەستبەکاربون و کاریان تێدا کراوە و لە کاردان.

 

لەبەرامبەردا، چۆمان فەلاح، وتەبێژی بەڕێوبەرایەتی گشتی وەبەرهێنانی گەرمیان بۆ رادیۆى ده‌نگ وتی: ئەم پرۆژانە سەرەتا مۆڵەتی وەبەرهێنانیان وەرگرتوە و دواتر لە ئەنجومەنی باڵای وەبەرهێنان رەزامەندیان پێدراوە کە دەتوانن دەست بەکارببن و یاساییە.

 

دەشڵێت: هۆکاری ئەمەش ئەوەیە پرۆژەکانی نیشتەجێبون کاتی زیاتریان دەوێت بۆ وەرگرتنی مۆڵەت بەهۆکاری رێکارە ئیدارییەکان، ئەمە جگە لەوەی کە هەندێکجاریش گۆڕانکاری لە هەیکەلیەتی پرۆژەکان دەکرێت، بۆیە مۆڵەتەکەشی درەنگ دەگەرێتەوە.

 

جەختی لەوەشکردوە: هیچ پرۆژەیەک بەبێ مۆڵەتی وەبەرهێنان و رەزامەندی ئەنجومەنی باڵای وەبەرهێنان، ناتوانێت دەست بەکاربێت و دواتر مۆڵەت بەدەست بهێنێت.