دەنگ نێت

 

لە سەرەتای ئەمساڵەوە ٨ ئۆتۆمبێل خۆیانکێشاوە بە راگرەکانی فولکەی 'پەری دەریا'ـی قەزای دەربەندیخان و وەرگەڕاون، بەڕێوبەری هاتوچۆی دەربەندیخانیش رونکردنەوە لەسەر کێشەکە دەدات و چارەسەرییەکانی دەخاتەڕو.

 

جاسم عەلی خان، بەڕێوبەری هاتوچۆی دەربەندیخان بە رادیۆی دەنگی راگەیاند: لە تونێلی دەربەندیخان دێیتە خوارەوە بۆ ناو شاری دەربەندیخان، لەو شوێنەی فولکەی 'پەری دەریا' هەیە دابەزینێکی زۆر سەختی هەیە لە گەڵ ۲ پێچی نیمچە بازنەیی کە شۆفێر وریا نەبێت کۆنترۆڵ لەدەستدەدات و دەبێتە هۆکاری وەرگەڕانی.

 

وتیشی: لە فولکەی 'پەری دەریا' کۆمەڵێک راگرمان داناوە کە ئۆتۆمبێل کۆنترۆڵ لەدەستدەدات یان ئیستۆپی نامێنێت ئەو راگرانە دەیانگرێتەوە، ئەگەر ئەو راگرانەش نەبێت ئۆتۆمبێل تاوەکو نێو بازاڕ ناوەستێت و کارەساتی گەورەی لێدەکەوێتەوە.

 

بەپێی ئامارێکی هاتوچۆی دەربەندیخان لە سەرەتای ئەمساڵەوە لەمساڵدا تاوەکو ئێستا ٨ روداوی پێکدادانی ئۆتۆمبیل بە راگرەکانی ئەو فولکەیە و وەرگەڕانی ئۆتۆمبێلەکان بەوهۆیەوە، تۆمارکراوە؛ بەوهۆیەشەوە ۷ کەس برینداربون و کەسێکیش گیانی لەدەستداوە.

 

بەڕێوبەری هاتوچۆی دەربەندیخان لەبارەی چارەسەری ئەو کێشەیەوە بۆ رادیۆی دەنگ وتی: ئەو دابەزینە سەختە، دەبێت سایدەکە فراوان بکرێتەوە یان شەقامەکە لێژییەکەی کەمبکرێتەوە، ئەگەر ئەمانەش بکرێت لەوانەیە ٥٠٪ـی روداوەکان کەمبکرێتەوە.