دەنگ نێت

 

بەفەرمانی وەزارەتی رۆشنبیری و لاوان، مۆڵەتی یانەی وەرزشی کەلار هەڵوەشایەوە، ئەندامێکی دەستەی دامەزراندنی یانەکەش دەڵێت: بابەتەکە یاساییە و لە هەفتەی داهاتوەوە هەوڵدەدەین بۆ چارەسەرکردنی.

 

سدیق رەحیم، لێپرسراوی کارگێڕیی و خۆیەتی لە بەڕێوبەرایەتی وەرزشی گەرمیان، بۆ رادیۆی دەنگ وتی: یانەی وەرزشی کەلار مۆڵەتەکەی کاتی بو بۆ ماوەی شەش مانگ، بۆ ئەوەی لەو ماوەیەدا کارە یاساییەکانیان تەواو بکەن، دواتر نزیکەی ۲ مانگیان خستە سەری و درێژیان کردەوە، کاتەکە تەواو بو و موڵکەکانیان نەکردە ناو یانەکەیانەوە و مۆڵەتەکەیان لەبەرواری (۳ـی ۱۱ـی ۲۰۲٤) هەڵوەشایەوە.

 

وتیشی: تەنها یانەی کەلار نییە مۆڵەتەکەی هەڵوەشاوەتەوە، بەڵکو ٦ یانەی تر هەن مۆڵەتەکانیان هەڵوەشاوەتەوە کە یەکێکیان یانەی کەلارە، ئەویش بەهۆی جێبەجێنەکردنی رێنمایی ژمارە ۲ـی وەزارەتی رۆشنبیری و لاوان.

 

رێنمایی ژمارە ۲ـی مۆڵەتی یانە وەرزشییەکان، لەلایەن وەزارەتی رۆشنبیری و لاوانەوە دەرکراوە و تایبەتە بە رێکخستنی کارەکانی یانە وەرزشییەکان، تیایدا کردویەتی بە مەرج هەر یانەیەکی نوێ دروست بکرێت دەبێت لە روی ژێرخانی وەرزشییەوە لەنمونەی: ئیدارەی یانە، یاریگا، هۆڵ و مەلەوانگە، کارەکانی تەواو بێت.

 

لەبەرامبەردا، محەمەد قادر، ئەندامی دەستەی دامەزراندنی یانەی کەلار، بەرادیۆی دەنگی راگەیاند: هیچ نوسراوێک بەشێوەیەکی فەرمی نەگەشتوەتە دەستی ئێمە لەبارەی هەڵوەشاندنەوەی مۆڵەتی  یانەکەمان.

 

وتیشی: چەند یانەیەکی دیکە کەموکورتییان هەبوە و ئێمەیان پێوە کردوە، چونکە ئێمە نوسراوی شارەوانی کەلارمان هەیە کە پشتگیریان کردوین و شتەکانمان یاساییە.

 

ئاماژەی بەوەشکرد: بابەتەکە گرفتێکی یاساییە و سەرەتای هەفتەی داهاتو دەچین چارەسەری دەکەین بەشێوەیەکی یاسایی.

 

لەبارەی ئەوەی یانەی کەلار هەندێک لە داواکاریی ژێرخانی وەرزشییان جێبەجێکردوە وەک ستافی یانەکە باسی لێوەدەکەن، لێپرسراوی کارگێڕیی و خۆیەتی لە بەڕێوبەرایەتی وەرزشی گەرمیان وتی: ئەو پێویستییانە دەبێت بەشێوەیەکی یاسایی، واتا بە شێوەی تاپۆ بەناویانەوەبێت، نەوەک ئەوەی بۆیان دابین کرابێت یان پێیان بدرێت و بەکاری بێنن، چونکە یانەی کەلاریش هیچ شتێکی لەسەر تاپۆ نییە، هەربۆیە مۆڵەتەکەی هەڵوەشاوەتەوە.