دەنگ نێت

 

دواى ئه‌وه‌ى له‌لایه‌ن فه‌رمانگه‌ى داواكارى گشتى گه‌رمیانه‌وه‌ فرۆشتنى زه‌وى نایاب له‌ قه‌زاى كفرى راگیرا به‌هۆكارى گومانی بونی رێککەوتن له‌ موزایه‌ده‌كاندا، سه‌رۆكى شاره‌وانى قه‌زاكه‌ش ده‌ڵێت: چاوه‌ڕوانى وه‌ڵامى وه‌زاره‌تمانین بۆ ئه‌وه‌ى ده‌ست به‌ پرۆسه‌كه‌ بكه‌ینه‌وه‌.

 

عه‌لى خورشید، سه‌رۆكى شاره‌وانى قه‌زاى كفرى بۆ رادیۆى ده‌نگ وتى: ئه‌و زه‌ویانه‌ى كه‌ دانرابو بفرۆشرێته‌وه‌ و بكرێت به‌ پرۆژه‌ى خزمه‌تگوزارى له‌ قه‌زاى كفرى خۆى له‌ ١٤ پارچه‌ زه‌وىدا ده‌بینێته‌وه.

 

ده‌شڵێت: له‌و زه‌ویانه‌ ٤ پارچه‌ى فرۆشرا و ١٠ دانه‌ى مایه‌وه‌، بەڵام داواكارى گشتى گه‌رمیان پرۆسه‌كه‌ى راگرت به‌ هۆكارى بونی گومان لەوەی رێكکه‌وتن هه‌یه‌ له‌ نێوان كڕیاره‌كان لەکاتی موزایەدەی فرۆشتنی زەویەکاندا.

 

جه‌ختى له‌وه‌شكرده‌وه‌: له‌لایه‌ن وه‌زاره‌تمانه‌وه‌ داواى رونكردنه‌وه‌مان لێكرا ئێمه‌ش وه‌ڵاممان دانه‌وه‌، بۆیه‌ له‌ ئێستادا بۆ ئه‌وه‌ى ده‌ست به‌ پرۆسه‌ى فرۆشتنى زه‌وى بكه‌ینه‌وه‌ چاوه‌ڕوانى وه‌ڵامى وه‌زارەتین بزانین ره‌زامه‌ند ده‌بێت یاخود نا.