دەنگ نێت

 

ئەنجومەنی وەزیرانی هەرێم، بڕیاری داوە بە زیادکردنی ٥١ ملیۆن و ٥٠٠ هەزار دینار بۆ پێشینە "نەسریە"ـی مانگانەی ئیدارەی گەرمیان.

 

بەپێی نوسراوێکی ئەنجومەنی وەزیران کە بۆ وەزارەتی دارایی ناردوە، ئاماژەی بەوەکردوە پێشینەی ئیدارەی گەرمیان لە ٢٦ ملیۆن و ٥٠٠ هەزار دینارەوە زیاد بکرێت بۆ ٧٨ ملیۆن دینار، بەمەش ٥١ ملیۆن و ٥٠٠ هەزار دیناری پێشینەی مانگانە بۆ ئیدارەکە زیادکراوە.

 

رونیشیکردوەتەوە: پێشینەی بەردەوامی ئیدارەی گەرمیان، لە ١١ ملیۆن و ٥٠٠ هەزار دینارەوە کراوە بە ٢٥ ملیۆن دینار.

 

هەربەپێی نوسراوەکە، پێشینەی بەردەستی سەرپەرشتیاری ئیدارەی گەرمیان لە ٥ ملیۆن دینارەوە کراوە بە ١٥ ملیۆن دینار، هاوکات دەسەڵاتیش دراوە بە سەرپەرشتیاری ئیدارەی گەرمیان بۆ بەخشینی پاداشت و یارمەتی بە فەرمانبەرانی ئیدارەکە و دەرەوەی ئیدارەکەش. 

 

لەلایەکی ترەوە پێشینەی باری لەناکاو بۆ ئیدارەی گەرمیان لە ٥ ملیۆن دینارەوە کراوە بە ٣٠ ملیۆن دینار، هاوکات پێشینەی باری لەناکاو بۆ قایمقامیەتەکان لە ٥ ملیۆن دینارەوە کراوە بە ٨ ملیۆن دینار.

 

ئەنجومەنی وەزیرانی هەرێم لە نوسراوەکەیدا ئاماژەی بەوەداوە ئەم بڕیارانە لە سەرەتای ئەم مانگەوە (ئابی ٢٠٢٤) دەچێتە بواری جێبەجێکردنەوە.