دەنگ نێت

 

ماوەی ٧ ساڵە لەلایەن حکومەتەوە چاپخانەیەک بۆ گەرمیان کڕدراوە، بەڵام تائێستا نەخراوەتەکار، بەڕێوبەری گشتی رۆشنبیریش دەڵێت: شوێن و ستافی دەوێت.

 

بەپێی ئەو زانیارییانەی رۆژنامەنوس دڵشاد ئەنوەر لە هەژماری خۆی لە فەیسبوک بڵاویکردونەتەوە، لەساڵی ٢٠١٤ـدا و لەسەر بودجەی پترۆدۆلار، چاپخانەیەکی گەورە بۆ گەرمیان کڕدراوە و رادەستی بەڕێوبەرایەتی رۆشنبیری گەرمیان کراوە، بەڵام لەو کاتەوە هیچ کارێکی پێنەکراوە.

 

لەوبارەوە رادیۆی دەنگ پەیوەندی بە عادل حسێن- بەڕێوبەری گشتی رۆشنبیری و هونەری گەرمیانەوە کرد.

 

ناوبراو جگە لەوەی ئاماژەی بەوەدا چاپخانەکە ٧ ساڵە کڕدراوە بۆیان، وتیشی: هۆکاری کارنەکردن بەو چاپخانەیە ئەوەیە کە لە پارچەکانیدا کەموکورتی هەیە و پارچە هەیە نەهاتوە لەگەڵیدا، بۆیە ناتوانرێت ببەسترێت.

 

دەشڵێت: هاوکات ستافێکی پسپۆڕی دەوێت بۆ بەستنی ئەو پارچانە، چونکە بەستنی ئەو پارچانە ئاسان نیە و دەبێت بگەڕێیتەوە بۆ ئەو کۆمپانیا ئەڵمانیەی کە ئامێرەکەی کڕیوە.

 

دەربارەی توانای بەکارخستنی چاپخانەکە پاش تەواوکردنی کەموکورتییەکانی، عادل حسێن هێمای بۆ ئەوەکرد: ئەم چاپخانەیە ستافی راهێنراوی دەوێت کە نیمانە، ئەمە جگە لەوەی شوێنی تایبەتمان نیە بۆ ئەو چاپخانەیە.

 

بەوتەی خۆی ئیشیان لەسەر کردوە شوێنی بۆ دابین بکەن و ستافیشی بۆ دابنرێت، بەڵام وەکخۆی وتی: "چاوەڕوانین بۆ ئەوەی کاری لەسەر بکرێت".