دەنگ نێت

 

دوای ئەوەی ئیدارەی گەرمیان رایگەیاند بەشێوەی گرێبەست (٥٨) کەس بۆ سایلۆی کەلار دادەمەزرێنرێت، سەرۆکی رێکخراوی پاڵپشتی شاری کفری ئاماژە بەوەدەکات دانیشتوانی قەزاکەیان بێ بەشکراون لە دامەزراندنەکە، دەشڵێت: قبوڵ ناکەین.

 

عوسمان قەتارچی، سەرۆکی رێکخراوی پاڵپشتی شاری کفری، بە رادیۆی دەنگی وت: ئەو کەسانەی بڕیارە دابمەزرێنرێن بە گرێبەست بۆ سایلۆی گەرمیان، دیارە کە بۆ هەمو هاوڵاتیانی گەرمیانە و هەمو کەسێکی ئەم سنورەش دەتوانێت ناو تۆمار بکات.

 

دەشڵێت: بۆ ئەم مەبەستە پەیوەندیمان بە وەزیری بازرگانی کردوە و پێی وتوین کە دامەزراندنەکە بۆ هەمو خەڵکی گەرمیانە، بەڵام لێرەدا ئیدارەی گەرمیان کفری لێ بێبەشکردوە و تەنها ئاماژەی بە شاری کەلار داوە، ئەمەش جێگای قبوڵکردن نیە.

 

جەختی لەوەشکردەوە: بەردەوامدەبین لە بەدواداچون بۆ چارەسەرکردنی ئەم کێشەیە و بۆ ئەوەی هەمو جارێک ئەم حاڵەتانە دوبارە نەبێتەوە.

 

یەکێک لەو مەرجانەی کە بۆ پێشکەشکردنی داواکاری دامەزراندن بۆ سایلۆی کەلار دیارییکراوە، ئەوەیە پێشکەشکارەکە دانیشتوی کەلار بێت و کارتی زانیارییەکەیشی کەلار بێت.