دەنگ نێت

 

به‌ڕێوبه‌رى سایلۆى گه‌رمیان داوا له‌ جوتیاران ده‌كات سه‌ربه‌خۆیانه‌ ئۆتۆمبێله‌كانیان نه‌هێننه‌ به‌رده‌م سایلۆ، چونكه‌ بەوتەی خۆی له‌گه‌ڵ بەڕێوبەرایەتی كشتوكاڵى گه‌رمیان رێکارێکی نوێیان گرتوەتەبەر.

 

كاروان ره‌ئوف، به‌ڕێوبه‌رى سایلۆى گه‌رمیان بۆ رادیۆى ده‌نگ باسى له‌وه‌كرد: له‌گه‌ڵ بەڕێوبەرایەتی گشتی كشتوكاڵى گه‌رمیان ئالیه‌تێكمان گرتوه‌ته‌به‌ر بۆ وه‌رگرتنى پرۆسه‌ى گه‌نمى ئه‌مساڵ كه‌ جوتیاران‌ راسته‌وخۆ ئۆتۆمبێلى گه‌نمه‌كانیان نه‌هێننه‌ به‌رده‌م سایلۆ تاوه‌كو ئاگادارده‌كرێنه‌وه‌ له‌لایه‌ن كشتوكاڵه‌وه‌، بۆ ئه‌وه‌ى جوتیاران پاره‌ى زیاترى مانه‌وه‌ى ئۆتۆمبێله‌كان نه‌ده‌ن.

 

ده‌شڵێت: رۆژانه‌ ده‌توانین ته‌نها ٤٠ بۆ ٤٢ ئۆتۆمبێل بخه‌ینه‌ڕێ كه‌ بەرهەمی نزیكه‌ى ١٠٠ جوتیار ده‌كات، بۆ ئه‌وه‌ى قه‌ره‌باڵەغیش دروستنه‌بێت پێویسته‌ جوتیاران چاوه‌ڕوانى كشتوكاڵ بن له‌ ئاگاداركردنه‌وه‌یان و دواتر ده‌توانن گه‌نمه‌كانیان بهێنن.

 

جه‌ختى له‌وه‌شكرده‌وه‌: تاوه‌كو ئێستا پرۆسه‌ى وه‌رگرتنى گه‌نم ده‌ستى پێنه‌كردوه‌ و چاوه‌ڕوانى به‌غدادین.