دەنگ نێت

 

نزیکەی ٦ کاتژمێرە رێگای کەلارـ دەربەندیخان ئاستەنگی هاتوچۆی بۆ دروست بوە بەهۆی مانگرتنی بارهەڵگرانەوە، بەڕێوبەری هاتوچۆی دەربەندیخانیش دەڵێت: فشار و قەرەباڵه‌غییەکی زۆر لەسەر قه‌زاى دەربەندیخان دروست بوە.

 

شۆفێرانی بارهەڵگر نزیکەی ٦ کاتژمێرە لە سەرەتای داخلبونی دەربەندیخان بەدیوی کەلاردا و بەدرێژی سەروی کیلۆمەترێک ئۆتۆمبێله‌كانیان راوه‌ستاندوه‌، ئەوەش بەهۆی ئەوەی رێگایان پێنادرێت داخلی شاری هەولێر ببن.

 

موقەدەم پشتیوان عابد، بەڕێوبەری هاتوچۆی دەربەندیخان، بۆ رادیۆی دەنگ وتی: لە نیوەڕۆوە ژمارەیەکی زۆر بارهەڵگر مانیان گرتوە بەهۆکاری ئەوەی رێگایان نادەن بڕۆنە هەولێر و گرفتیان بۆ دروست دەکرێت، فشار و قەرەباڵه‌غییەکی زۆر لەسەر قه‌زاى دەربەندیخان دروست بوە.

 

وتیشی: ناکرێت لە هەولێر رێگات لێبگیرێت و لە دەربەندیخان رێگا بگریت، ئەمە هیچ لە بابەتەکە ناگۆڕێت، لە نیوەڕۆە بەقەسەی خۆش ویستومان قەناعەتیان پێبکەین کە گردبونەوەکە لە دەربەندیخان لابەن و بیبەنە ئەو شوێنانەی کە نزیکن لەو شوێنەی رێگریان لێدەکرێت، بەڵام هیچ ئەنجامێکی نەبوە.

 

باسی لەوەشکرد: دەربەندیخان پڕ بوە لە گەڵابە و ئۆتۆمبێلی بارهەڵگر، ئێستا ئەمبوڵانسێک لەکەلارەوە بێت بۆ سلێمانی چۆن بڕوات؟