دەنگ نێت

 

دانیشتوانی ناحیەی باوەنور گازندەی ئەوەدەکەن ماوەی چوار رۆژ بێ ئاو بون و ئەمڕۆش کە ئاویان پێدراوە ئاوەکەی لێڵەو بە کەڵکی خواردنەوە نایەت، ئاوی دەوروبەری گەرمیانیش دەڵێت: بەهۆی بارانبارینی چەند رۆژی رابردو بیرەکانی ناحیەکە پڕبونەتەوە. 

 

میعاد ئەحمەد، دانیشتوی ناحیەی باوەنورە و بۆ رادیۆی دەنگ وتی: ماوەی چوار رۆژە ئاومان پێنەدراوە و ئەمڕۆژ کە دەبێتە پێنجەم رۆژ ئاوێکی لێڵمان پێدراوە کە بەکەڵکی خواردنەوە نایەت و خەڵکی بە تانکەر ئاو دەکڕن. 

 

لەبەرامبەردا، سالار عەزیز، وتەبێژی بەڕێوبەرایەتی ئاوی دەوروبەری گەرمیان، بە رادیۆی دەنگی وت: بەهۆی بارانبارینی ماوەکانی رابردوەوە ئاوی روباری سیروان لێڵ بوە و هەروەها هەمو بیری ئاوەکانی ناحیەکەش پڕبونەتەوە.

 

وتیشی: ئەمڕۆ بە ناچاری ئاومان پێداون بۆ ئەوی بێ ئاو نەبن، بەڵام لێڵە و تا لێڵیەکەی نامێنێ کاتی ئەوێت.

 

ئاماژەی بەوەدا کە یەک چارەسەری ریشەیی هەیە ئەویش تەواوکردنی پڕۆژەی پاڵاوگەی ئاوی ناحیەکەیە، کە بەوتەی خۆی  ئەگەر تەواوبکرێت کێشەی ئاوی ناحیەکە و دەوروبەریشی چارەسەر ئەکات، بەڵام بەهۆی نەبونی پارەی پێویست و کێشەی نەختینەوە ئەو پرۆژە جێبەجێ نەکراوە.