دەنگ نێت

 

دوای ئەوەی تەمەنی گەیشتە خانەنشینی، بە فەرمانی سەرۆکی حکومەت ساڵێک خزمەتی وەزیفیی بۆ شەهاب ئەحمەد- قایمقامی قەزای کەلار درێژکرایەوە.

 

بەپێی نوسراوێکی مەسرور بارزانی- سەرۆکی حکومەتی هەرێمی کوردستان کە ٣١ـی ١ـی ٢٠٢٤ واژوی کردوە و وێنەی دەست رادیۆی دەنگ کەوتوە، فەرمانیکردوە بە درێژکردنەوەی خزمەتی شەهاب ئەحمەد- قایمقامی کەلار بۆ ماوەی ساڵێک.

 

لە نوسراوەکەدا هاتوە: "لەسەر پێشنیاری وەزارەتی ناوخۆ بەنوسراویان ژمارە (٢١٨٠٦/ خ) لە (٨ـی ٨ـی ٢٠٢٣)، بڕیارماندا بە درێژکردنەوەی ماوەی خزمەتی بەڕێز (شەهاب ئەحمەد محێدین) قایمقامی قەزای کەلار بۆ ماوەی (١) یەک ساڵ لەسەر میلاکی وەزارەتی ناوخۆ".

 

دەشڵێت: ئەم فەرمانە لە رێکەوتی تەواوبونی تەمەنی یاسایی ناوبراوەوە جێبەجێ دەکرێت.

 

شەهاب ئەحمەد، لە پشکی بزوتنەوەی گۆڕان لە کۆتاییەکانی ساڵی ٢٠١٤ـەوە قایمقامی قەزای کەلارە، لەمساڵیشدا بەهۆی ئەوەی تەمەنی گەشتبوە خانەنشینی و فەرمانی درێژکردنەوەی خزمەتی بۆ دەرنەکرابو، دانا ئەحمەد- بەڕێوبەری ناحیەی شێخ تەویل لە جێگەکەی دا بە وەکالەت کاروبارەکانی رادەپەڕاند.