دەنگ نێت

 

بەپێی زانیارییەکانی رادیۆی دەنگ، لە کۆبونەوەی ئەمڕۆی بەڕێوبەری قوتابخانەکانی سنوری گەرمیان، بڕیاریانداوە لە سبەینێوە بگەڕێنەوە هۆڵەکانی خوێندن و دەست بە دەوام بکەن.

 

بەڕێوبەری قوتابخانەیەک کە ئامادە نەبو ناوی بهێنرێت، بە رادیۆی دەنگی وت: داوا لە مامۆستایان دەکەین بۆ دەستکردنەوە بۆ دەوام، بەڵام فشار لە مامۆستایان ناکەین.

 

هاوکات هەر ئەمڕۆش مامۆستایانی ناڕازیی گردبونەوەیان لەبەردەم بینای بەڕێوبەرایەتی گشتی پەروەردەی گەرمیان ئەنجامدا و دەستکردنەوە بە دەوامیان رەدکردەوە.

 

دوێنێ وەزیری پەروەردەی هەرێم نوسراوێکی واژوکرد کە تیایدا ئاماژە بە بەجێبەجێکردنی (٢) لە داواکانی مامۆستایانی ناڕازیی کرد کە بریتیی بون لە "پلەبەرزکردنەوەی مامۆستایان لەچوارچێوەی یاسا بەرکارەکان و بە گرێبەست کردنی مامۆستایانی وانەبێژی دانەمەزراو بەگوێرەی رێنماییەکانی وەزارەتی دارایی و ئابوری".

 

بەدوای ئەم نوسراوەشدا هەر دوێنێ بەڕێوبەرایەتی گشتی پەروەردەی گەرمیان نوسراوێکی ئاراستەی پەروەردەی قەزاکان کرد و تیایدا داوای کرد ٩ـی ئەم مانگە دەوام لە ناوەندەکانی خوێندن دەستپێبکەنەوە.

 

کلیک بکە بۆ بینینی دیمەنی دەرچونی بەڕێوبەری قوتابخانەکانە لە کۆبونەوەکەی پەروەردەی گەرمیان، نێردراوی رادیۆی دەنگ ویستی لێدوان لە بەڕێوبەری قوتابخانەکان وەربگرێت، بەڵام ئامادە نەبون لێدوان بدەن.