دەنگ نێت

 

دەنگۆی دەستپێکردنەوەی دەوامی خوێندن لەم هەفتەیەدا گەرمە، ئەندامێکی ئەنجومەنی مامۆستایانی ناڕازیی جەخت لە بونی دەنگۆکە دەکاتەوە و ئەندامێکی لقی گەرمیانی یەکێتی مامۆستایان دەڵێت بە فەرمی هیچمان پێنەگەیشتوە.

 

بەگوێرەی ئەو زانیارییانەی دەست رادیۆی دەنگ کەوتوە، بڕیارە ئەم هەفتەیە دەستپێکردنەوەی دەوامی خوێندن لە سنوری پارێزگای سلێمانی و هەڵەبجە و ئیدارەکانی گەرمیان و راپەڕین رابگەیەنرێت، ئەمەش دوای ئەوەی وەرزی یەکەمی ئەمساڵی خوێندن بە هۆی بایکۆتەوە لەم سنورەدا بەڕێوەنەچو.

 

م. نەبەرد ئەحمەد، ئەندامی ئەنجومەنی مامۆستایانی ناڕازیی گەرمیان، جەختی لە بونی ئەو دەنگۆیە کردەوە و بە رادیۆی دەنگی وت: هەڵوێستی ئێمە رونە، ئەویش جێبەجێکردنی داواکارییەکانمانە لەپێدانی موچەکانمان هەر ٣٠ رۆژ جارێک و دەستپێکردنەوەی پلەبەرزکردنەوەمان و هەروەها دامەزراندنی مامۆستایانی وانەبێژ.

 

بەپێی ئەو دەنگۆیەی کە چەند مامۆستایەک بۆ رادیۆی دەنگ پشتڕاستیان کردەوە، بڕیاروایە وەزیری پەروەردە دەستپێکردنەوەی دەوام رابگەیەنێت لەبەرامبەردا بڕیار لە دەستپێکردنەوەی پلەبەرزکردنەوەی مامۆستایان و بە گرێبەست دامەزراندنی مامۆستایانی وانەبێژ رابگەیەنێت.

 

 لایخۆشییەوە، عارف عومەر- ئەندامی ئەنجومەنی لقی گەرمیانی یەکێتی مامۆستایانی کوردستان، بە رادیۆی دەنگی وت: ئێمەش ئەم زانیارییانەمان هەر وەکو دەنگۆ بیستوە و هیچ شتێکی فەرمیمان پێنەگەیشتوە.