دەنگ نێت

 

لە کاتی هەوڵدان بۆ دەستگیرکردنی تۆمەتبارێک، روبەڕوبونەوە لەنێوان تۆمەتبارەکە و چەند هاوڕێیەکی لەلایەک و مەفرەزەیەکی پۆلیس لەلایەکی دیکەوە رودەدات، بەوهۆیەوە ٢ ئەفسەر و پۆلیسێک برینداربون و تۆمەتبارەکانیش هەڵهاتون.

 

عەلی جەمال قەدوری- وتەبێژی بەڕێوبەرایەتی پۆلیسی گەرمیان، لە کۆنگرەیەکی رۆژنامەوانییدا ئەمڕۆ (یەکشەمە) رایگەیاند: درەنگانی شەوی رابردو لەسەر فەرمانی بەڕێز دادوەری لێکۆڵینەوەی کەلار و بە رەزامەندی دادوەری لێکۆڵینەوەی قۆرەتو، مەفرەزەیەکمان رۆشتونەتە گوندی ساڵح ئاغا لەناحیەی قۆرەتو بۆ دەستگیرکردنی کەسێک کە تۆمەتبارە بە دزییکردن.

 

وتیشی: تۆمەتبارەکە، دو تۆمەتباری تر و و کەسی دیکەیشی لەگەڵ بوە، واتا سەرجەمیان ٥ کەس بونە، بە دەمانچە و کڵاشنکۆف روبەڕوی مەفرەزەکە بونەتەوە و نارنجۆک "رومانە"ـیان بە مەفرەزەکەدا تەقاندوەتەوە.

 

باسی لەوەشکرد: لە ئەنجامدا دو ئەفسەر و کارمەندێکی پۆلیس بریندار بون و باری تەندروستیان جێگیرە، ئەفسەرێک و کارمەندەکە لە نەخۆشخانە دەرچون و ئەفسەرێکی دیکە ماوەتەوە و پێویستی بە نەشتەرگەرییە.

 

وتەبێژی پۆلیسی گەرمیان، ئاماژەی بەوەکرد هەر پێنج کەسەکە هەڵهاتون و لە هەوڵی دەستگیرکردنیان دان، دەستیشیان گرتوە بەسەر ئۆتۆمبیلێک و دو ماتۆڕسکیلی تۆمەتبارەکان لە شوێنی روداوەکەدا.

 

وتیشی: تۆمەتبارەکان هیچیان کارمەندی هێزە ئەمنییەکان نین و چەکی بێ مۆڵەتیان پێبوە.