دەنگ نێت

 

لەگەرمیان زیاتر لە 1500 یەکەی نیشتەجێبون بەشێوەی شوقە تایبەت بەکرێنشینان دروستدەکرێت کە تێچویەکی کەمتری هەیە، کۆمەڵەی داکۆکی لە مافی کرێنشینانیش دەڵێت: رێکارەکانی تەواوبوە و چاوەڕێین سایت پلانەکەی پەسەندبکرێت.

 

یەکەکان بەم شێوەیە دابەشدەبن لەگەرمیاندا: کەلار 900 یەکەیە، رزگاری 340 یەکەیە و کفری 260 یەکەیە، کە بەشێوەی شوقەدروستدەکرێن، بەڵام خزمەتگوزاریی وەک قوتابخانەو دایەنگەو باخچەی ساوایان و نەخۆشخانەی تیانیە، بەوپێیەت چونکە لەتەنیشت پڕۆژە نیشتەجێبونەکانی تر دروستدەکرێت و دەتوانن سود لەخزمەتگوزاریەکانی ئەو پڕۆژانە وەربگرن.

 

سەیوان کەریم ، سەرۆکی لقی گەرمیانی کۆمەڵەی داکۆکی لە مافی کرێنشینان، بە رادیۆی دەنگی وت: دوای پەسەندبونی سایت پلانەکەی، نوسراو دەدرێت بۆ دەستەی وەبەرهێنان بۆ پێدانی مۆڵەتی دەستبەکاربون،  دوای ئەوەش دەستدەکرێت بەسیاجکردنی روبەرە زەوییەکە.

 

دەشڵێت: داوا لە کرێنشینان دەکەین بێن بەدەم نوێ کردنەوەی ناسنامەکانیانەوە و ئەوکەسانەشی ناسنامەکەیان تەواو بوە بێن بیبەنەوە، بۆ ئەوەی ژمارەی تەواوەتی کرێنشینانی گەرمیان دیاریبکەین و لەکاتی خۆیدا ناویان تۆماربکرێت بۆ سودمەندبون لەو یەکانە.