دەنگ نێت

 

به‌ڕێوبه‌رى گشتی وه‌به‌رهێنانى گه‌رمیان ده‌ڵێت: زه‌وى پێشنیار كراوه‌ بۆ ئه‌و 900 یه‌كه‌یه‌ى كه‌ بڕیارە بۆ كه‌مده‌رامه‌تان دروست بكرێت.

 

هونه‌ر مه‌حمود، بۆ رادیۆى ده‌نگ وتى: له‌و 20 هه‌زار یه‌كه‌ نیشته‌جێبونه‌ى كه‌ ئه‌نجومه‌نى وه‌زیران بڕیاریدا بۆ كه‌مده‌رامه‌تان لەسەرانسەری هەرێم دروست بكرێت، 1500 یەکەی به‌ر گه‌رمیان ده‌كه‌وێت، ئه‌مه‌ش دابه‌ش بوه‌ به‌سه‌ر كه‌لار كه‌ 900 یه‌كه‌ى به‌رده‌كه‌وێت و كفرى 360 یه‌كه‌ و ناحیه‌ى رزگارییش 240 یه‌كه‌.

 

وتیشى: له‌ ماوه‌كانى پێشوتر گرفتى زه‌ویمان هه‌بو له‌ كه‌لار بۆ ئه‌وه‌ى ته‌رخان بكرێت بۆ ئه‌و پرۆژه‌یه‌، به‌ڵام له‌ ئێستادا زه‌وى بۆ پێشنیار كراوه‌ و خۆى له‌ 23 دۆ‌نم ده‌بینێته‌وه‌ كه‌ ده‌كه‌وێته‌ پشته‌وه‌ى پرۆژه‌ى بان ستى "‌پیشه‌وه‌ران"‌.

 

جه‌ختى له‌وه‌شكرده‌وه‌: تاوه‌كو ئێستا ته‌رخانكردنمان بۆ نه‌كراوه‌، چونكه‌ داواى هه‌ندێك رونكردنه‌وه‌مان كردوه‌ له‌ ده‌سته‌ى وه‌به‌رهێنان بۆ ئه‌وه‌ى بزانین شێوازى پرۆژه‌كه‌ چۆن بێت، بۆیه‌ چاوه‌ڕێى وه‌ڵامین بۆ ئه‌وه‌ى ده‌ست به‌كاربكه‌ین.