دەنگ نێت

 

دوای ئەوەی پەروەردەی گەرمیان ئاشکرای کرد لە زۆربەی قوتابخانەکانی گەرمیان دەوام دەستیپێکردوەتەوە، ئەندامێکی ئەنجومەنی مامۆستایانی ناڕازیش رەتیدەکاتەوە کە زۆرینەبێت و دەڵێت: لە پێنج قوتابخانە زیاتر تێپەڕ ناکات.

 

پێشتر دارا ئەحمەد، بەڕێوبەری گشتی پەروەردەی گەرمیان، بەرادیۆی دەنگی وت: زۆرێک لەقوتابخانەکانی گەرمیان دەوامی تێدا دەکرێت و کتێبیش دابەشدەکرێت و تەنها پۆلی دوازدە و پۆلی نۆی بنەڕەتیش نییە، بەڵکو لەهەمو پۆلەکانی تر دەوامدەکرێت، بەڵام بەرێژەیەکی زۆر پۆلەکانی دوازدە و نۆ دەوامدەکەن.

 

لە بەرامبەردا ئاری عیزەدین، ئەندامی ئەنجومەنی مامۆستایانی ناڕازی بە رادیۆی دەنگی وت: ئەو قوتابخانانەی دەوام دەکەن ژمارەیان لە پێنج قوتابخانە تێپەڕ ناکات، لەو ژمارەیەش رێژەیەکی زۆر کەم مامۆستا رۆشتۆتەوە، لەهەندێکیشیان خوێندکار نەڕۆشتوەتەوە.

 

وتیشی: هەندێک لەو قوتابخانانە هەر لەسەرەتاوە لەگەڵ بایکۆت نەبون، بەڵام مامۆستاکان دەوامیان نەکردوە.

 

بەوتەی ئاری عیزەدین "ئەمە تەنها بۆ ئەوەیە بڵێن دەواممان کردوەتەوە ئەگینا هیچ دەوامێکی رێکوپێک و فەرمی تائێستا نیە".

 

دەستپێکردنەوەی دەوام لەو قوتابخانانە لەکاتێکدایە ماوەی دو مانگە مامۆستایان بەردەوامن لەبایکۆتی هۆڵەکانی خوێندن بەکاریگەری خەرجنەکردنی موچەکانیان و دانەمەزراندنیان.