دەنگ نێت

 

پرۆژەی دروستکردنی هەزار یەکە نیشتەجێبونەکەی کارمەندانی تەندروستی گەرمیان لەئێستادا پەسەندکراوە، سەرۆکی لقی گەرمیانی سەندیکای کارمەندانی تەندروستیش دەڵێت: بڕیارە لەچەند رۆژی داهاتودا دەستبکرێت بە جێبەجێکردنی.

 

لەشاری کەلار پرۆژەیەکی نیشتەجێبون بۆکارمەندانی تەندروستی دروستدەکرێت، کە دەکەوێتە پشت جادەی پشتێنەیی کەلار و خۆی لەهەزار یەکەی نیشتەجێبون دەبینێتەوە.

 

عەدنان ئەحمەد، سەرۆکی لقی گەرمیانی سەندیکای کارمەندانی تەندروستی، بەرادیۆی دەنگی وت: پڕۆژەکە هەمو رێکارە یاساییەکانی تەواوبوە و تەنها هەندێک وردەکاری ماوە لە ئیدارەی گەرمیان، بڕیارە لەچەند رۆژی داهاتودا دەستبکرێت بە جێبەجێکردنی.

 

لەبارەی نرخی یەکەکانی و شێوازی دابەشکردنی، سەرۆکی لقی گەرمیانی سەندیکای کارمەندانی تەندروستی گەرمیان رونکردنەوەی نەدا، بەوپێیەی هێشتا یەکلانەکراوەتەوە.