دەنگ نێت

 

نزیكه‌ى ۹ مانگه‌ بڕیار لە قه‌ره‌بوى ئه‌و ۱٥۰ ماڵه‌ دراوە کە لە 'لیوا رەشەکە'ـی کەلار دان، بەڵام تائێستا قەرەبو نەکراونەتەوە، سەرۆکی شارەوانیش دەڵێت: چاوەڕێی لیژنەی کشتوکاڵین.

 

دوای ئه‌وه‌ى حكومه‌ت بڕیاریدا به‌ قه‌ره‌بوكردنه‌وه‌ى ئه‌و ماڵانه‌ى كه‌ له‌ گه‌ڕه‌كى 'لیواره‌شه‌كه‌' و 'جه‌مه‌لۆنه‌كه‌'ـی کەلار نیشته‌جێن بەوەی یەکی به‌ زه‌وییه‌كى ۲۰۰ مه‌تریان پێبدرێت و خانوەکەیان چۆڵ بکەن، به‌كۆى گشتى و بە هەردو گەڕەکەکەوە‌ ۱٦۰ ماڵ تۆمارکران.

 

ئه‌كره‌م ساڵح، سه‌رۆكى شاره‌وانى قه‌زاى كه‌لار، لەبارەی دواین زانیاری پرۆسەی قەرەبوکردنەوەی ئەو ماڵانەوە، بۆ رادیۆى ده‌نگ وتى: ئه‌و ماڵانه‌ى كه‌ له‌ لیواڕه‌شه‌كه‌ى قه‌زاى كه‌لار نیشته‌جێن، رێكاره‌كانى قه‌ره‌بوكردنه‌وه‌یان ته‌واو بوه‌.

 

وتیشى: چاوه‌ڕوانى ئه‌وه‌ین قه‌ره‌بوى ئه‌و جوتیارانه‌ بكرێته‌وه‌ كه‌ زه‌وییه‌كانیان دانراوە ئیفراز بکرێت و بکرێت بە نیشتەجێبون، دواتر لەو زەویانە قەرەبوی ماڵە نیشتەجێبوەکانی لیوا رەشەکە دەکرێتەوە.

 

لەبارەی ئەوەی کەی ئەم رێکارانە تەواو دەبن بەتایبەتی کە زستان لە رێیە؟ سەرۆکی شارەوانی کەلار وتی: لیژنەی کشتوکاڵ سەرقاڵی قەرەبوکردنەوەی زەوی جوتیارەکانە، هەرکە تەواوبو ماڵەکانی لیوا رەشەکە دەچنە سەر زەوی خۆیان.