دەنگ نێت

 

هاوڵاتیان کە سەردانی پارکێکی کەلار دەکەن نیگەرانی دەردەبڕن لەوەی ماتۆڕسکیل دەهێنرێتە نێو پارکەکەوە، قایمقامیەتی کەلاریش دەڵێت نوسراومان بۆ لایەنە ئەمنییەکان کردوە و دەبێت رێگەی لێبگیرێت.

 

بەوتەی چەند هاوڵاتییەک کە بۆ رادیۆی دەنگ قسەیان کرد، لە پارکی نزیک گەڕەکی جوتیاران و کەلاری کۆن کە ژمارەیەکی زۆر لە خێزانەکان ئێواران بۆ پشودان سەردانی دەکەن، ژمارەیەک لێخوڕی ماتۆڕسکیل، ماتۆڕسکیلەکەیان دەهێننە نێو پارکەکەوە و بەنێو هاوڵاتیاندا دێن و دەچن، کە ئەمەش بێزاری کردون و کەشی پارکەکەی تێکداوە.

 

رادیۆی دەنگ ئەم کێشەیەی خستەبەردەم قایمقامیەتی قەزای کەلار، هه‌ردى سه‌ركه‌وت، به‌رپرسى به‌شى راگه‌یاندنى قایمقامیه‌تى كه‌لار، لەوبارەوە وتی: قه‌ده‌غه‌مان کردوە ماتۆڕسکیل بچێتە نێو پارکەکان، بەوهۆیەی دەبنە مایەی بێزارکردنی هاوڵاتیان به‌تایبه‌ت ئه‌و شوێنانه‌ى خێزانین.

 

وتیشى: نوسراوی فەرمیمان کردوە بۆ لایەنە ئەمنیەکانی قەزای کەلار کە شەوانە هەر حاڵەتێک هاوڵاتیان بێزاربکات، رێگری لێبکرێت.

 

پێشتریش رۆژنامەنوس: دڵشاد ئەنوەر، لە هەژماری خۆی لە فەیسبوک بڵاویکردەوە کە بەشێک لەو پارکانە بون بە شوێنی نێرگەلە کێشانی گەنجان، لەکاتێکدا زۆرێک لە خێزانەکان بۆ پشودان دەچنە ئەو پارکانە.

 

هەردی سەرکەوت، لەوبارەوە بە رادیۆی دەنگی وت: بەهەمانشێوە ئەو دیاردەیەشمان قەدەغەکردوە و لایەنە ئەمنییەکانمان راسپاردوە رێگریی بکەن لە کێشانی نێرگەلە لەو پارکە گشتی و خێزانییانە.