دەنگ نێت

 

نوێنەری مامۆستایانی وانەبێژ لە کەلار دەڵێت: هێشتا وەکو دەستەی نوێنەرانی کەلار بڕیاری یەکجاریمان نەداوە لەسەر بابەتی مانگرتن بۆ ئەمساڵی خوێندن.

 

مەجید محەمەد، نوێنەری مامۆستایانی وانەبێژ لە گەرمیان، بۆ رادیۆی دەنگ وتی: دو دەستەی نوێنەرانی مامۆستایان بڕیاریان داوە چالاکی بکەن بەڵام پەروەردەی کەلاری تیانیە، بڕیارەکەشمان لەسەر بڕیاری حکومەت وەستاوە کە تاچەند دەچێتە بواری جێبەجێکردنەوە.

 

ئاماژەی بەوەشدا: ئێمە داوای ئەوەدەکەین کەبەتەواوەتی دابمەزرێین بەشێوەیەکی هەمیشەیی، پلانی حکومەتیش بەگرێبەست بونە بۆ سەرجەم مامۆستایان، چونکە ئەوکات کەمتر لەسەر حکومەت دەکەوێت.

 

مووچەی وانەبێژان لە نێوان 200 بۆ 400 هەزار دیناردایە و بە گریبەستکردن یان دامەزراندنیان مووچەکەیان بەگوێرەی بڕوانامەکانیان زیاتر دەبێت. کۆی پارەی مووچەکەشیان لە مانگێکدا 13 ملیار و 200 ملیۆن دینارە.

 

نوێنەری وانەبێژان وتیشی: ئەگەر بڕیاری  بەگرێبەست بون بدرێت ئەوە کەیسەکەمان هەنگاوێک دەچێتە پێشەوە و لەوە باشترە  کەهەر وانەبێژ بین، بەڵام دوای ئەو بڕیارەش هەر بەردەوام دەبین لە چالاکیەکانمان بۆ بەدەستهێنانی تەواوی مافەکانمان.