دەنگ نێت

 

گەنجێک لە گوندی گردەگۆزینەی سەر بە کەلار، لەکاتی راوەماسی دا لەدەستی هێزەکانی پۆلیسی دارستان هەڵدێت، دواتر لەلایەن هێزەکانی حەشدی شەعبیەوە و بە گومانی تیرۆریستی دەستگیر دەکرێت.

 

رۆژی ۳ـی ٨ـی ۲۰۲۳، پۆلیسی دارستانی گەرمیان بڵاویکردوەتەوە کە دوکەس سەرقاڵی راوە ماسی بون بەشێوەیەکی نایاسایی و بە کارەبا، دوای ئەوەی راوچیەکان پۆلیسی دارستان دەبینن هەڵدێن بەرەو ناوچەی ژێر دەسەڵاتی حەشدی شەعبی.

 

یەکێک لەو کەسانەی کە راوی کردوە و هەڵهاتوە بۆ ژێر دەسەڵاتی حەشدی شەعبی و لەوێ دەستگیرکراوە، گەنجێکە بەناوی (ئەحمەد عزەدین رۆستەم) کە لەدایکبوی ۱۹۹۹یە و دانیشتوی گوندی گردەگۆزینەی سەر بە قەزای کەلارە.

 

حسێن عزەدین، برای ئەحمەدی دەستگیرکراو، سەبارەت بەو کێشەیەی بەسەر براکەیدا هاتوە، بۆ رادیۆی دەنگ وتی: براکەم راوەماسی کردوە، کاتێک هاتونەتە سەری، رایکردوە و لە سنوری پێشمەرگە دەرچوە، چوتە سنوری سوپای عێراق و حەشدەوە، لەوێ دەستگیرکراوە.

 

جەختیشی کردەوە: بە گومانی ئەوەی براکەی گومانلێکراو و داعشە، دەستگیرکراوە، بەڵام بەوتەی خۆی براکەی داعش نیە و تەنها راوە ماسی کردوە و لە پۆلیسی دارستان هەڵهاتوە.