دەنگ نێت

 

نزیکەی ۳ مانگە نەخۆشانی پەککەوتنی گورچیلە لە گەرمیان دەرمانی تایبەت بە نەخۆشیەکەیان پێنادرێت، بەرپرسێکی تەندروستی دەڵێت: بەشێکی لە بەغدا دەرمانەکە نایەت، بەشێکیشی کۆمپانیاکانی دەرمان نایهێنن بەهۆی گرانی نرخی دەرمانەکەوە.

 

کاروان محەمەد، بەڕێوبەری سەنتەری گورچیلەی دەستکرد لە گەرمیان، بە رادیۆی دەنگی راگەیاند: دیارترین چارەسەری ئەو نەخۆشانەی پەککەوتنی گورچیلە (عجزی گورچیلە)یان هەیە، شروبێکە بەناوی (ساندمیۆن Sandimmun) کە هەر نەخۆشێک مانگی یەک شوشەی لێ بەکاردێنێت، پێشتر ئەم شروبە هەندێکی لە بەغدادەوە بۆمان دەهات و ئێستا نایەت، کۆمپانیاکانی دەرمانیش نایهێنن، بەهۆی ئەوەی نرخەکەی گرانە و نەخۆشی کەم بەکاری دەهێنێت.

 

وتیشی: ئەگەر چارەسەرەکە لەهەر کۆمپانیایەک هەبێت و پەسەندی کوالێتی کۆنترۆڵی هەبێت، ئێمە لیژنەمان هەیە و پارەشمان لەبەردەستدایە و ئامادەین بیکڕین.

 

لەبارەی ئەوەی کێشەکە بەس لە گەرمیانە یان لە تەواوی هەرێم؟ وتی: ئەم کێشەیە بەس لە گەرمیاندا نیە، لە بەغدا و کۆگای سلێمانی و هەولێریش هەمان گرفت هەیە.

 

نزیکەی ۱٦۰ نەخۆشی پەککەوتنی گورچیلە لە سنوری ئیدارەی گەرمیاندا هەن، لەو ژمارەیەش ۱۲۰ نەخۆشیان ئەو شروبە وەردەگرن. نزیکەی ۳ مانگە، لە بازاڕدا شروبەکە نرخی تا نزیکەی ۱۲۰ هەزار دینار بەرز بوەتەوە، ئەمەش لەکاتێکدایە زۆرێک لە نەخۆشەکان بەهۆی گرانی نرخەکەوە پێیان ناکڕدرێت.