دەنگ نێت 

 

سەرۆکی شارەوانی قەزای کفری دەڵێت: بەپێی ئەو پلانەی کە دانراوە هەرکات فڕۆکەخانە لە گەرمیان دروست بکرێت، دەکەوێتە قەزای کفریەوە و ٢ شوێنیشمان بۆ ئەو مەبەستە دیاریی کردوە.

 

عەلی خورشید، سەرۆکی شارەوانی قەزای کفری، بە رادیۆی دەنگی راگەیاند: پاش ئەوەی پلانی ستراتیژی ۲۰۲٤ و ۲۰۲٥ دانرا بڕیار درا هەرکات فڕۆکەخانە لە گەرمیان دروست بکرێت، شوێنەکەی قەزای کفری بێت.

 

وتیشی: پلانەکە هێشتا پەسەند نەکراوە لەلایەن عێراقەوە، نازانم ئەگەر گۆڕانکاری تێدا روبدات، بەڵام قەزای کفریمان دیاری کردوە بۆ فڕۆکەخانە.

 

لەبارەی ئەوەی فڕۆکەخانەکە دەکەوێتە چ شوێنێکی قەزای کفرییەوە، سەرۆکی شارەوانی قەزاکە وتی: کفری کێشەی زەویوزاری نیە، دو شوێنمان دیاری کردوە، شوێنی یەکەم نزیک گوندی ناساڵەح نێوان ناحەی سەرقەڵاو قەزای کفری، شوێنی دوەم لە کەرتی تلیشانە نزیک شەقامی پشتێنەیی کفری بەرەو خوارەوە.