دەنگ نێت

 

بەڕێوبەرایەتی گواستنەوەی گەرمیان بڕیاردەدات هەر پاس و مینی پاسێکی هێڵەکانی دەرەوەی شار فێنککەرەوە هەڵنەکات، ۳ بۆ ۱٥ رۆژ دەستبەسەر ئۆتۆمبێلەکەیدا دەگیرێت، بەڵام ئەو رێکارە بە "هۆکارێک" لەناوشاردا جێبەجێ ناکرێت.

 

ئیدریس مستەفا، بەڕێوبەری گوستنەوەی گەرمیان، بە رادیۆی دەنگی راگەیاند: هەر پاس و مینی پاسێک لە هێڵی دەرەوەی شاری ناحیەکانی سەر بە قەزای کەلار فێنککەرەوەی ئۆتۆمبێلەکانیان بۆ سەرنشینەکانیان دانەگیرسێنن سزا دەدرێن.

 

وتیشی: سزاکە دەست بەسەرداگرتنی ئۆتۆمبێلەکەیە لە ۳ رۆژ بۆ ۱٥ رۆژ.

 

هێڵەکانی دەرەوەی شار لە قەزای کەلار بریتین لە: (کەلارـ کفری، کەلارـ رزگاری، کەلارـ باوەنور، کەلارـ پەروێزخان، کەلارـ دەربەندیخان و کەلارـ سلێمانی)

 

لەبارەی ئەوەی ئەم بڕیارە مینی پاسەکانی ناو شار دەگرێتەوە، بەڕێوبەری گواستنەوەی گەرمیان وتی: بڕیاکە جێبەجێ ناکرێت، چونکە گونجاو نیە، بەهۆی ئەوەی دەرگاکان زو زو دەکرێتەوە سەرنشین دادەبەزێت، بۆیە ئۆتۆمبێلەکە فێنک نابێتەوە.