دەنگ نێت

 

پاش زیاتر لە هەفتەیەک مانگرتن، نوێنەری مانگرتوانی قەزای کفری دەڵێت: دەبێت  قایمقامی قەزاکە دەستلەکاربکێشێتەوە.

 

عوسمان قەتارچی، نوێنەری مانگرتوان و سەرپەرشتیاری رێکخراوی پاڵپشتیی کفری، بە رادیۆی دەنگی وت: کۆمەڵێک داواکاریمان هەیە، یەکێک لەوانە دەستلەکارکێشانەوەی خودی قایمقامی قەزای کفریە.

 

ئاماژەی بەوەشکردوە: قایمقامی قەزاکە دو ساڵە لەو پۆستەدایە و هیچ رۆڵێکی نەبوە لەچارەسەرکردنی کێشەکانیان، بەڵکو بە پێچەوانەوە "کێشەکانی زیاتر کردوە".

 

رادیۆی دەنگ بۆ وەرگرتنی قسەی ئەو لەوبارەیەوە، پەیوەندی بە شەماڵ نامق- قایمقامی قەزای کفرییەوە کرد، بەڵام پەیوەندییەکەی بێوەڵام بو.

 

زیاتر لە هەفتەیەکە ژمارەیەک لە هاوڵاتیان و چالاکوانانی قەزای کفری، دەستیان بە مانگرتن کردوە، هۆکارەکەشیان بەستوەتەوە بە نەبونی خزمەتگوزاری و پشتگوێخستنی قەزاکەیان لەلایەن حکومەتەوە.

 

دوێنێش لێپرسراوی خاڵی پشکنینی خۆراکی کفری، وەکو یەکەم بەرپرسی حکومیی دەستی لەکارکێشایەوە، ئەوەش وەکو هەڵوێست وەرگرتن لەبەرامبەر ئەوەی هیچ لایەنێکی حکومی بەدەم داواکاری دانیشتوانی قەزاکەیانەوە نەهاتوە.