دەنگ نێت

 

به‌ڕێوبه‌رى راگه‌یاندنى ده‌زگاى ئاسایشى هه‌رێم رایده‌گه‌یەنێت: هه‌ڵمه‌تى ده‌ست به‌سه‌راگرتنى ماتۆڕسكیلى بێسه‌ره‌تا به‌رده‌وامى هه‌یه‌ و له‌ سنورى ئیداره‌ى گه‌رمیانیش سه‌روى 100 ماتۆڕسکیل ده‌ستى به‌سه‌ردا گیراوه‌.

 

عه‌قید: سه‌لام عەبدولخالق، بۆ رادیۆى ده‌نگ وتى: ئه‌م هه‌ڵمه‌ته‌ چه‌ند رۆژێك پێش جه‌ژن ده‌ستى پێكردوه‌، له‌ سنورى گه‌رمیانیشدا سه‌ره‌تا نزیكه‌ى 20 ماتۆڕسكیل ده‌ستى به‌سه‌ردا گیرا، به‌ڵام ئێستا رێژه‌كه‌ گه‌یشتوه‌ته‌ سه‌روى 100 ماتۆڕسکیل.

 

ده‌شڵێت: ئه‌و ماتۆڕسكیلانه‌ ده‌ستكارى ساڵانسه‌کانیان کراوە و دەنگیان بەرزکراوەتەوە، کە‌ ئه‌مه‌ش بوه‌ته‌ هۆى بێزارى هاوڵاتیان و دروستبونى ژاوه‌ژاو له‌ نێو شوێنه‌ نیشته‌جێبونه‌كان.

 

هێماى بۆ ئه‌وه‌كرد: هه‌ڵمه‌ته‌كه‌ تایبه‌ته‌ به‌ ماتۆڕسكیل، به‌ڵام له‌گه‌ڵ ئه‌وه‌شدا چه‌ند ئۆتۆمبێلێكى بێسه‌ره‌تاش كه‌ نایاسایین، ده‌ستیان به‌سه‌ردا گیراوه‌.

 

جه‌ختى له‌وه‌شكرده‌وه‌: چاره‌نوسى ئه‌و ئۆتۆمبێل و ماتۆڕسكیلانه‌ له‌لایه‌ن دادگاوه‌ یه‌كلا ده‌كرێته‌وه‌ چی لێده‌كرێت.

 

وتیشی: هەڵمەتەکە بەردەوامی دەبێت و کاتێکی دیاریکراوی نییە بۆ تەواوبونی.