دەنگ نێت

 

بەڕێوبەری بەڕێوبەرایەتی ئاودێریی گەرمیان دەڵێت: پۆندەکانی گەرمیان پێویستیان بە پاککردنەوەیە، بەڵام پارەمان بۆ تەرخان ناکرێت ئەگەرچی بڕەکەی کەمترە لە ملیارێک دینار.

 

پۆند، هاوشێوەی بەنداوە و کاری گلدانەوەی ئاوە، بەڵام ئەم روبەر و تواناکەی کەم و سنوردارە و زۆرتریش لەسەر رێڕەوی ئاوی باراناو و چەمە وەرزییەکان دروستدەکرێن. لە گەرمیان دا ١٠ پۆندی ئاو هەیە.

 

موئەیەد ئەحمەد، بەڕێوبەری بەڕێوبەرایەتی ئاودێریی گەرمیان، بە رادیۆی دەنگی وت: پۆندەکانمان پێویستییان بە پاککردنەوە هەیە، پاککردنەوەشیان ٨٠٠ تاوەکو ٨٥٠ ملیۆن دیناری دەوێت، بەڵام هیج تەرخانکردنێکی بۆ نەکراوە.

 

ئاماژەی بەوەشکرد، نوسراوەکانیان بۆ پاککردنەوەی پۆندەکان لە وەزارەتی دارایین و تاوەکو ئێستا وەڵام نەدراونەتەوە.

 

پێشتریش بەڕێوبەری ئاودێریی گەرمیان ئاماژەی بەوەدابو زۆربەی پۆندەکانیان لەوکاتەوەی دروستکراون نۆژەن نەکراوەنەتەوە، ئەمەش وایکردوە توانای عەمبارکردنی ئاو تیایاندا کەم بێتەوە بەهۆی کەڵەکەبونی قوڕ و لیتەوە.