دەنگ نێت

 

پێدانی کارەبای نیشتیمانی بەهاوڵاتیان لە گەرمیان کەمی کردوە، وتەبێژی کارەبای گەرمیانیش جەخت دەکاتەوە کە بەهۆی چاکسازیکردنەوە کارەبا کەمکراوەتەوە، بەڵام زۆر ناخایەنێت.

 

لە رێکەوتی ۱/٦/۲۰۲۳ کۆمپانیای دانا غاز بڵاویکردەوە بەهۆی چاکسازیەکان لە کێڵگەکانی غاز بۆ ماوەی ۲۹ کاتژمێر بڕی ۱٥۰ ملیۆن پێ سێجا بەرهەمهێنانی غاز کەمدەبێتەوە.

 

ئالان ئەرکان، وتەبێژی بەڕێوبەرایەتی گشتی کارەبای گەرمیان، بە رادیۆی دەنگی راگەیاند: بەهۆی چاکسازیەکەوە نزیکەی ۱۰۰۰ مێگاوات کارەبا لە هەرێمی کوردستان کەمی کردوە، لەئێستادا بەشێک لە چاکسازیەکەی کۆمپانیای داناغاز تەواو بوە و نزیکەی ٤۰۰ مێگاوات کارەبا گەڕاوەتەوە.

 

وتیشی: پێشتر بەشە کارەبای گەرمیان نزیکەی ۱۲٥ مێگاوات کارەبا بوە، بەڵام کراوە بە ۱۰۰ مێگاوات.

 

لە ئێستادا بەهۆی بەرزبونەوەی پلەکانی گەرما خواستی هاوڵاتیان لەسەر کارەبا زیادی کردوە، وتەبێژی کارەبای گەرمیانیش جەختی کردەوە بڕیارە لە نزیکترین کاتدا چاکسازیەکە تەواو بکرێت، بەڵام کاتی بۆ دیاری نەکرد و وتی: لەنزیکترن کاتدا چاکسازیەکەتەواو دەبێت و دۆخی کارەبا ئاسایی دەبێتەوە.