دەنگ نێت

 

دواى ئه‌وه‌ى سه‌رۆكى شاره‌وانى كه‌لار باسى له‌وه‌كرد كه‌ رێكاره‌كانى تاپۆكردنى گه‌ڕه‌كى سیروان ته‌واو بوه‌ و له‌ تۆمارى خانوبه‌ره‌ى گه‌رمیانه‌ به‌مه‌به‌ستى تاپۆكردنى، به‌ڕێوبه‌رى تاپۆى گه‌رمیانیش ئه‌وه‌ ره‌ت ده‌كاته‌وه‌.

 

ئه‌كره‌م ساڵح، سه‌رۆكى شاره‌وانى كه‌لار، له‌ لێدوانێكیدا پێشتر بۆ رادیۆى ده‌نگ وتى: ئه‌و گه‌ڕه‌كانى كه‌ به‌ زیاده‌ڕه‌وى دروست كراون له‌ قه‌زاى كه‌لار، له‌سه‌ر كۆى بڕگه‌كانیان كار كراوه‌، یه‌كێك له‌و گه‌ڕه‌كانه‌ گه‌ڕه‌كى سیروانه‌ كه‌ له‌ ئێستادا ته‌واو بوه‌ له‌ به‌ڕێوبه‌رایه‌تى تۆمارى خانوبه‌ره‌ى گه‌رمیانه‌ به‌مه‌به‌ستى تاپۆ كردنى.

 

له‌ به‌رامبه‌ردا، ئه‌كره‌م ره‌زا، به‌ڕێوبه‌رى به‌ڕێوبه‌رایه‌تى تۆمارى خانوبه‌ره‌ى گه‌رمیان، به‌ رادیۆى ده‌نگى راگه‌یاند: مانگێك به‌ر له‌ ئێستا دۆسیه‌ى ئه‌و گه‌ڕه‌كه‌ هاتوه‌ته‌ لامان به‌مه‌به‌ستى تۆماركردنى، به‌ڵام هه‌ندێك گرفتى تێدابوه‌ ناردومانه‌ته‌وه‌ بۆ شاره‌وانى كه‌لار به‌مه‌به‌ستى چاككردنى.

 

جه‌ختى له‌وه‌شكرده‌وه‌: له‌ ئێستادا هیچ مامه‌ڵه‌یه‌كى ئه‌و گه‌ڕه‌كه‌ له‌لاى ئێمه‌ نیه‌، چونكه‌ شاره‌وانى كه‌لار بۆی نه‌هێناوینه‌ته‌وه‌.